حسن مجتبٰی بی بی سی اردو ڈاٹ کام، نیویارک

	لال مسجد آپریشن کے حوالے سے مذہبی حلقوں میں اشتعال پایا جاتا ہے

نیویارک سے جمعہ کے روز سی پی جے کی طرف سے جاری کیے جانے والے اس خط میں کہا گیا ہے کہ لاہور کے روزنامے’آج کل‘ کے ایڈیٹر انچیف نے سی پی جے کو بتایا ہے کہ لال مسجد سے تعلق رکھنے والے مذہبی رہنما مبینہ طور ان کے اخبار کے خلاف بیانات جاری کر رہے ہيں اور اس وجہ سے ان کے اخبار کے عملے کی سلامتی شدید خطرے میں ہے۔

سی پی جے کے خط میں خبر رساں ایجنسی رائٹر کی شائع شدہ ایک خبر کے حوالے سے بتایا گیا ہے کہ روزنامہ ’آج کل‘ نے نو جولائي کو جامعہ حفصہ کی انچارج اور لال مسجد آپریشن میں پکڑے جانے والے مولانا عبدالعزیز کی اہلیہ ام حسان کا کارٹون شائع کیا تھا جس میں انہیں اپنے حمایتیوں اور ان کے بچوں سے خطاب کرتے دکھایا گیا تھا۔

اس کارٹون کی اشاعت کے بعد ام حسان اور ان کی حمایتیوں نے گیارہ جولائي کو روزنامے کے خلاف مظاہرہ کیا اور اخبار اور اس کے عملے کے خلاف مبینہ طور پر تشدد پر اکسانے والے بیانات جاری کیے۔

نجم سیٹھی نے سی پی جے کو بتایا کہ گيارہ جولائی کو لال مسجد میں کانفرنس کے بعد کچھ گمنام لوگوں نے ان کے اخبار کے اسلام آباد دفتر میں دھمکی آمیز ٹیلیفون کیے اور ان کے عملے کو متنبہ کیا کہ وہ ان کے صبر کو مت آزمائيں۔سیٹھی نے بتایا کہ اس کے بعد اس قسم کی دھمکی آمیز ٹیلیفون کالیں ان کے اخبار کے لاہور دفتر میں بھی عملے کو موصول ہوئيں۔

’ کمیٹی ٹو پروٹیکٹ جرنسلسٹس‘ نے اپنے خط میں میں وزیراعظم کو مخاطب کرتے ہوئے کہا ہے کہ’ہم نجم سیٹھی کے اخبار کو ملنے والی ایسی دھمکیوں کا انتہائي سنجیدگی سے نوٹس لیتے ہیں‘۔ سی پی جے کے خط کے آخر میں وزیراعظم سے مطالبہ کیا گیا ہے کہ ان صحافیوں اور میڈیا کے اداروں کے تحفط کو یقینی بنایا جائے جو ناقدانہ رائے رکھتے ہیں۔