 | | | کانفرنس میں مختلف قراردادیں پیش کی گئیں |
اسلام آباد کی مرکزی لال مسجد اور اس سے متّصل جامعہ حفصہ کے خلاف فوجی آپریشن کے ایک سال مکمل ہونے پر اتوار کو لال مسجد میں علماء کنونشن میں ہزاروں افراد نے شرکت کی ہے۔ اس کنونشن میں جامعہ حفصہ کی دوبارہ تعمیر، لال مسجد آپریشن کے ذمہ داروں کے خلاف قتل کے مقدمات کے اندراج اور مسجد کے خطیب مولانا عبدالعزیز کی رہائی کے مطالبات کیے گئے ہیں۔ لال مسجد ایکشن کمیٹی کے زیراہتمام ہونے والی اس شہدائے لال مسجد کانفرنس میں صدر پرویز مشرف اور اس وقت کی وفاقی کابینہ کے بعض ارکان کے خلاف بھی قراردادیں منظور کی گئیں۔ اس مقام پر جہاں ایک سال پہلے جامعہ حفصہ موجود تھی اور اس سے متّصل سڑک پر ہزاروں کی تعداد میں جمع ہونے والے طلبا نے تمام دن علماء کرام کی تقاریر سنتے گزارا۔ مقررین نے ایک سال قبل فوجی آپریشن میں ہلاک ہونے والے لال مسجد کے نائب خطیب عبدالرشید غازی کو پُرزور انداز میں خراج عقیدت پیش کیا۔ وفاق المدارس اور ملک میں قائم مدارس کی دیگر تنظیموں سے متلق علماء نے اپنی تقاریر میں صدر پرویز مشرف اور گزشتہ حکومت کی وفاقی کابینہ میں شامل بعض ارکان کو تنقید کا نشانہ بنایا۔ | | | فوجی کارروائی کے دوران لال مسجد کے نائب خطیب عبدالرشید غازی ہلاک ہو گئے تھے |
تقاریر کے لیے سڑک کے بیچوں بیچ بنائے گئے اونچے سٹیج پر سے وقتاً فوقتاً قراردوں کو پیش کرنے کا سلسلہ بھی جاری رہا۔ ان قراردادوں کا ہدف بھی لال مسجد آپریشن سے متعلق حکومتی ارکان ہی تھے۔ ایک قرارداد میں صدر پرویز مشرف کو آبپارہ چوک میں پھانسی دینے اور سابق وفاقی وزراء اعجازالحق اور آفتاب شیر پاؤ کے ملک بھر کی مساجد اور مدارس میں داخلے پر پابندی عائد کرنے کا بھی مطابہ کیا گیا۔ وفاقی دارالحکومت کے مرکز میں ہونے والی اس ملک گیر کانفرنس کے لیے سیکیورٹی کا خصوصی بندوبست کیا گیا تھا۔ اردگرد کی سڑکوں اور گلیوں کو خار دار تاریں لگا کر بند کردیا گیا تھا اور دن بھر پولیس کے اہلکار اسلام آباد کی سڑکوں پر گشت بھی کرتے رہے۔ مشیر داخلہ رحمٰن ملک نے بھی ایک موقع پر کانفرنس کا دورہ کیا اور ملک کے دور دراز علاقوں سے آئے ہوئے مہمانوں کی آم سے تواضع کرنے کی کوشش کی جسے سٹیج پر سے ایک اعلان کے ذریعے مسترد کر دیا گیا۔ | 
باجوڑ: قبائل اور حکومت میں معاہدہ
