شہزاد ملک بی بی سی اردو ڈاٹ کام، اسلام آباد

	حزبِ اختلاف نے بڑھتی ہوئی مہنگائی کی وجہ سے حکومت کے خلاف ہڑتال کی کال دینے کی بھی دھمکی دی ہے

اس اجلاس میں ملک میں امن وامان کی صورتحال، بالخصوص پاکستان اور افغانستان کی سرحد پر بگڑتی ہوئی صورتحال، پیٹرولیم کی مصنوعات میں اضافے اور مہنگائی کی صورتحال کو زیر بحث لایا جائے گا۔

سینیٹ میں قائد حزب اختلاف کامل علی آغا کے مطابق اپوزیشن ارکان کی طرف سے سینیٹ کے اس اجلاس کے دوران پنجاب حکومت کی طرف سے بلدیاتی اداروں کے امور میں مداخلت کے معاملے کو بھی اُٹھایا جائے گا۔ ان کا کہنا تھا کہ بلدیاتی اداروں کو قانونی تحفظ حاصل ہے اور اُن کی جماعت ہر سطح پر ان اداروں کا دفاع کرے گی۔

حزبِ اختلاف نے ملک میں بڑھتی ہوئی مہنگائی کے حوالے سے موجودہ حکومت کے خلاف ہڑتال کی کال دینے کی بھی دھمکی دی ہے۔

واضح رہے کہ قومی اسمبلی میں قائد حزب اختلاف چوہدری پرویز الہی نے الزام عائد کیا تھا کہ پنجاب حکومت اور بلخصوص پاکستان مسلم لیگ نون بلدیاتی اداروں کو توڑنے اور ناظمین کو ہراساں کرنے کے درپے ہیں۔

اُن کا کہنا تھا کہ یہ سیاسی جماعت اس لیے ان اداروں کو نشانہ بنا رہی ہے کیونکہ ان بلدیاتی اداروں میں مسلم لیگ نون کی نمائندگی نہ ہونے کے برابر ہے۔
پرویز الہی کا کہنا تھا کہ انہوں نے پنجاب حکومت کے اس روئیے کے خلاف قومی اسمبلی میں تحریک التوا جمع کروا دی ہے۔