بیورو رپورٹ بی بی سی اردو ڈاٹ کام،اسلام آباد

	نواز شریف کے حلقہ این اے 123 میں ضمنی انتخابات ملتوی کر دیےگئےتھے

دوسری جانب سپریم کورٹ نے سزائے موت کو عمر قید میں تبدیل کرنے کے مجوزہ حکومتی فیصلے کے خلاف ازخود نوٹس کی سماعت اٹارنی جنرل کی درخواست پر کارروائی یکم اگست تک ملتوی کردی۔

پاکستان مسلم لیگ کے رہنماؤں میاں نواز شریف اور میاں شہباز شریف کی انتخابات میں حصہ لینے کی اہلیت سے متعلق مقدمے کی سماعت کے دوران ان کے وکلاء نے ذاتی وجوہ کی بنا پر سماعت ملتوی کرنے کی درخواست کی جسے عدالت نے منظور کر لیا۔

ڈپٹی اٹارنی جنرل راجہ عبدالرحمٰن نے سماعت کے بعد صحافیوں کو بتایا کہ انہوں نے بھی سماعت ملتوی کیے جانے کی درخواست کی مخالفت نہیں کی۔

اس مقدمے میں میاں نواز شریف کی وکالت اکرم شیخ جبکہ وزیر اعلیٰ پنجاب شہباز شریف کی نمائندگی ایڈووکیٹ جنرل پنجاب خواجہ حارث کر رہے ہیں۔

راجہ عبدالرحمٰن نے صحافیوں کو بتایا کہ عدالت چونکہ پہلے ہی چیف الیکشن کمشنر کو میاں شہباز شریف کے خلاف نااہلی کی درخواست کی سماعت کے لیے ٹربیونل کی تشکیل سے روکنے کی وفاق کی درخواست مسترد کر چکی ہے لہذا اس دوران چیف الیکشن کمشنر کو اپیلیٹ ٹریبیونل تشکیل دینے کا اختیار حاصل ہے۔

واضح رہے کہ لاہور ہائیکورٹ کےدو جج صاحبان پر مشتمل بنچ کی جانب سے متضاد فیصلہ آنے کے بعد چیف الیکشن کمشنر نے یہ معاملہ اپیلیٹ ٹریبیونل کے سپرد کرنے کا فیصلہ کیا تھا جس کی مخالف وفاقی حکومت نے سپریم کورٹ میں اپیل دائر کی تھی۔ اسی نوعیت کے ایک مقدمے میں لاہور ہائیکورٹ نے ہی میاں نواز شریف کو انتخابات میں حصہ لینے کے لئے نا اہل قرار دے دیا تھا جس کے خلاف وفاق ہی نے سپریم کورٹ میں اپیل دائر کرتے ہوئے ان کے حلقے میں انتخاب ملتوی کرنے کا اعلان کیا تھا۔

ادھر سزائے موت کے خاتمے کے وزیراعظم کے فیصلے کے خلاف ازخود نوٹس کی سماعت کے موقع پر آج چیف جسٹس عبدالحمید ڈوگر کی سربراہی میں تین رکنی بینچ کو اٹارنی جنرل عبدالقیوم نے بتایا کہ وزیر اعظم اور وزیر قانون ملک میں موجود نہیں جس کی وجہ سے وہ حکومت کو موقف معلوم نہیں کرسکے لہذا عدالت کیس کی سماعت ملتوی کردے۔