رفعت اللہ اورکزئی بی بی سی اردو ڈاٹ کام، پشاور

	کرم ایجنسی میں ہلاک کیئے جانے والے افراد کا تعلق مبینہ طور پر جرائم پیشہ افراد سے بتایا جاتا ہے

لوئر کرم ایجنسی کے اسسٹنٹ پولیٹکل ایجنٹ عطاؤ الرحمان نے بی بی سی کو تصدیق کی کہ گزشتہ روز خپیا نگا کے علاقے سے نامعلوم مسلح افراد نے اٹھ افراد کو اغواء کیا تھا۔

انہوں نے کہا کہ نامعلوم افراد نے تمام مغویوں کو قتل کرکے ان کی لاشیں مندوری کے علاقے میں سڑک کے کنارے پھینکے تھے۔ اہلکار کے مطابق انتظامیہ نے لاشیں تحویل میں لیکر واقعہ کی تحقیقات شروع کردی ہے۔ اس قتل کی وجہ فوری طورپر معلوم نہیں ہوسکی ہے۔

مقامی لوگوں کا کہنا ہے کہ ہلاک شدگان کے ہاتھ پیچھے سے باندھے ہوئے تھے جبکہ ان کی آنکھوں پر بھی پٹیاں باندھی گئی تھیں۔

مقامی ذرائع کے مطابق ہلاک کئے جانے والے چھ افراد کا تعلق خپیا نگا سے بتایا جاتا ہے جبکہ دو افراد نامعلوم ہیں۔ بعض ذرائع کا کہنا ہے کہ ہلاک ہونے والے افراد کا تعلق جرائم پیشہ گروہوں سے بتایا جاتا ہے۔ تاہم سرکاری طورپر اس بات کی تصدیق نہیں ہوسکی۔ تاحال کسی تنظیم نے اس واقعہ کی ذمہ داری قبول نہیں کی ہے۔

کرم ایجنسی میں گزشتہ ایک سال سے حالات کشیدہ بتائے جاتے ہیں۔ علاقے میں تمام اہم شاہراہیں اور سڑکیں کئی ماہ سے بند پڑی ہیں جس کی وجہ سے مقامی لوگوں کو شدید مشکلات کا سامنا ہے۔