عزیزاللہ خان بی بی سی اردو ڈاٹ کام، کوئٹہ

	مظاہرین نے وزیر اعلی سے مطالبہ کیا کہ وہ ان کے ساتھ نماز جنازہ میں شرکت کریں جس پر وزیر اعلی ان کے ساتھ روانہ ہوگئے

ریلوے ملازمین اور ریلوے کالونی کے مکینوں سے احتجاج کے دوران باتیں کرتے ہوئے وزیر اعلی نواب اسلم رئیسانی نے جائینٹ روڈ پر قتل کی واردات کی سخت الفاظ میں مذمت کی ہے اور کہا ہے کہ جنھوں نے یہ حرکت کی ہے ان پر وہ ہاتھ ضرور ڈالیں گے۔

بلوچستان: ریل کا نظام معطل

انھوں نے کہا کہ اس کی اجازت کوئی معاشرہ مذہب یا اخلاق نہیں دیتا اور یہ کوئی بی ایل اے یا بی الف وغیرہ نہیں ہے بلکہ کوئی اور دھندے والے ہیں جو اس شہر کا امن تباہ، حکومت کو غیر مستحکم اور آباد کار بھایوں کو نقصان پہنچانا چاہتے ہیں لیکن وہ بچ کر نکل نہیں سکیں گے۔

وزیر اعلی نے کہا کہ انھیں اگر سو فیصد نہیں تو پچاس فیصد ضرور یقین ہے کہ یہ کن لوگوں نے کیا ہے۔

اس دوران مظاہرین میں سے کسی نے کہا کہ جب سے نواب اسلم رئیسانی کی حکومت قائم ہوئی ہے صوبے اور شہر کا امن تباہ ہو گیا ہے تو وزیر اعلی نے کہا کہ آپ لوگ چاہتے ہیں تو ہم استعفیٰ دے دیں گے ’ آپ آجائیں ہم حکومت چھوڑ دیں گے۔‘

انھوں نے کہا کہ اگر اس اسمبلی میں کوئی ہے جو امن لا سکتا ہے تو وہ اس شخص کو سلام کریں گے لیکن معاملہ اتنا آسان نہیں ہے۔ انھوں نے کہا کہ پولیس اس صوبے میں امن کے قیام کے لیے کوششیں کر رہی ہے لیکن اس میں کچھ لوگ ہیں جو حالات بہتر نہیں ہو نے دیتے لیکن انھیں یقین ہے کہ صورتحال جلد بہتر ہو جائے گی۔

مظاہرین نے وزیر اعلی سے مطالبہ کیا کہ وہ ان کے ساتھ نماز جنازہ میں شرکت کریں جس پر وزیر اعلی ان کے ساتھ روانہ ہوگئے۔

اس کے علاوہ آج گوادر میں گورنر بلوچستان نواب ذوالفقار مگسی سے صحافیوں نے مصالحت کے عمل کے بارے میں پوچھا تو انھوں نے کہا کہ اس کا جواب وزیر اعلی ہی دے سکتے ہیں۔