رفعت اللہ اورکزئی بی بی سی اردو ڈاٹ کام، پشاور

	حملہ آور صحافی کا موٹر سائیکل اور کیمرہ چھین کر اپنے ساتھ لے گئے

باجوڑایجنسی سے موصول ہونے والی اطلاعات میں سرکاری ذرائع کے مطابق یہ واقعہ جمعرات کو عنایت کلی کے علاقے میں پیش آیا۔

باجوڑ کے اسسٹنٹ پولیٹکل ایجنٹ محمد جمیل نے بی بی سی کو بتایا کہ ایکسپریس ٹی وی سے وابستہ مقامی صحافی محمد ابراہیم موٹر سائیکل پر گھر جارہے تھے کہ عنایت کلی بائی پاس کے قریب گھات لگائے نامعلوم مسلح موٹر سائیکل سواروں نے ان پر اندھا دھند فائرنگ کردی جس سے وہ موقع ہی پر ہلاک ہوگئے۔

انہوں نے کہا کہ حملہ آور صحافی کا موٹر سائیکل اور کیمرہ چھین کر اپنے ساتھ لے گئے ہیں۔ مقامی انتظامیہ نے واقعہ کی تحقیقات شروع کردی ہے۔

مقتول صحافی کے رشتہ داروں کا کہنا ہے کہ مقتول کی کسی ذاتی دوشمنی نہیں تھی۔

پشاور میں ایکسپریس نیوز کے بیور چیف جمشید احمد باغوان نے بی بی سی کو بتایا کہ محمد ابراہیم باجوڑ ایجنسی میں تحریک طالبان پاکستان کے مرکزی ترجمان مولوی عمر کا انٹرویو کرکے واپس آرہے تھے کہ نامعلوم افراد ان کو نشانہ بنایا جس سے موقع ہی جان بحق ہوگئے۔

انہوں نے کہا کہ محمد ابراہیم نے انٹرویو کرنے سے پہلے ان کو مطلع کیا تھا اور بعد میں بھی ان سے بات ہوئی تھی۔ انہوں نے بتایا کہ اس وقت یہ کہنا قبل ازوقت ہوگا کے صحافی کو کس نے ہلاک کیا ہے۔

درین اثناء پشاور میں صحافیوں کی تنظیم خیبریونین اف جرنلسٹس اور پشاور پریس کلب نے باجوڑ ایجنسی میں صحافی کی فرائض سرانجام دینے کے دوران ہلاکت کی سخت الفاظ میں مذمت کی ہے اور حکومت سے مطالبہ کیا ہے کہ مقتول کی قاتلوں کو فوری طورپر گرفتار کیا جائے۔

محمد ابراہیم باجوڑ ایجنسی کے ایک سنئیر صحافی تھے۔ ان کا شمار ٹرائیبل یونین اف جرنلسٹس کے اہم رہنماوں میں ہوتا تھا۔

واضح رہے کہ کچھ ماہ قبل بھی باجوڑ ایجنسی میں ایک مقامی صحافی کو نامعلوم مسلح افراد نے گولیاں مارکر ہلاک کیا تھا۔ علاقے میں نشانہ بناکر قتل کے واقعات میں ایک بار پھر اضافہ دیکھنے میں آیا ہے۔