عبدالحئی کاکڑ بی بی سی اردوڈاٹ کام، پشاور

	قبائلی علاقوں اور صوبہ سرحد میں ایچ آئی وی سے متاثرہ افراد کی تعداد تقریباً چھ سو تک پہنچ چکی ہے

صوبائی ایڈز کنٹرول کےپروگرام آفسر ڈاکٹر راجول نے بی بی سی کوبتایا کہ ’گزشتہ چند سالوں کے دوران قبائلی علاقوں اور صوبے کے جنوبی اضلاع میں امن و امان کی خراب صورتحال کی وجہ سے وہاں پر ایچ آئی وی کے مریضوں کی تعداد میں اضافہ ہوا ہے۔‘

ان کے بقول ایچ آئی وی ایڈز کے زیادہ ترمریضوں کا تعلق فرقہ ورانہ فسادات سے متاثرہ کرم ایجنسی، شمالی و جنوبی وزیرستان اور ضلع بنوں سے ہے جہاں پر ہونے والی جھڑپوں میں زخمی ہونے والے افراد کو بغیر کسی تشخیص کےخون کا عطیہ دیا جاتاہے۔ جس کے نتیجے میں ایچ آئی وی ایڈز کے وائرس کے صحت مند افراد کو منتقل ہونے کا خطرہ بڑھ گیا ہے ۔

انہوں نے مزید بتایا کہ ’ان علاقوں میں ایچ آئی وی ایڈز کا مرض خلیجی ممالک میں محنت مزدوری کرنے والے ان افراد کی وجہ سے پھیل گیا ہے جنہیں عرب ممالک کے حکام خون کی سالانہ تشخیص کے دوران ایچ آئی وی پازیٹیو پاکر واپس پاکستان بھیج دیتے ہیں۔ان کے بقول ایڈز سے متاثرہ یہ ا فراد وطن واپس آکر ایچ آئی وی وائرس اپنے بیوی بچوں کو منتقل کردیتے ہیں۔‘

متضاد اعداد و شمار  پاکستان میں سرکاری طور پر ایچ آئی وی ایڈز سے متاثرہ تین ہزار کے قریب مریض رپورٹ کیےگئے ہیں تاہم مختلف بین الاقوامی ایجنسیوں کے مطابق پاکستان میں ایچ آئی وی پوزیٹو کیسوں کی تعداد ایک لاکھ کے قریب ہو سکتی ہے ڈاکٹر راجول

ڈاکٹر راجول کے مطابق پاکستان میں سرکاری طور پر ایچ آئی وی ایڈز سے متاثرہ تین ہزار کے قریب مریض رپورٹ کیےگئے ہیں تاہم مختلف بین الاقوامی ایجنسیوں کے مطابق پاکستان میں ایچ آئی وی پوزیٹو کیسوں کی تعداد ایک لاکھ کے قریب ہو سکتی ہے۔