عبادالحق بی بی سی اردو ڈاٹ کام، لاہور

	نواز شریف نو مئی تک پاکستان واپس آئیں گے

کلثوم نواز اپنے علاج کے لیے گزشتہ ماہ لندن گئی تھیں۔ اس وقت نواز شریف کو ان کے ہمراہ لندن روانہ ہونا تھا لیکن معزول ججوں کی بحالی کے معاملے میں تعطل کی وجہ سے انہوں نے دورہ منسوخ کر دیا تھا۔

نواز شریف کے ہمراہ ان کی بیٹی مریم صفدر کے علاوہ وفاقی وزیر بیگم تہمینہ دولتانہ بھی لندن گئی ہیں۔ لاہور کے ہوائی اڈے پر نواز شریف کی آمد کے موقع پر کڑے حفاظتی انتظامات کیے گئے تھے۔

نواز شریف کی لندن روانگی کے موقع پر ذرائع ابلاغ کے نمائندوں کی بڑی تعداد موجود تھی تاہم نواز شریف نے ان سے کوئی بات چیت نہیں کی۔

بیگم کلثوم نواز کا چھ مئی کو آپریشن ہے اور یہ امکان ہے کہ نواز شریف نو مئی کو وطن واپس آجائیں گے۔