احمد نور بی بی سی اُردو ڈاٹ کام، لاہور

	شریف برادران نے جلاوطنی سے کوئی سبق حاصل نہیں کیا: پرویز الٰہی

لاہور میں جمعہ کو مسلم لیگ ہاؤس میں ایک پریس کانفرنس کے دوران پرویز الہی نے یہ الزام خاص طور پر مسلم لیگ نون پر لگایا اور کہا کہ اس میں پاکستان پیپلز پارٹی بھی شامل ہے۔

اُن کے مطابق قاف لیگ کے ورکروں کے خلاف دہشت گردی جیسی سنگین دفعات کے علاوہ دیگر مقدمات بھی درج کئے جا رہے ہیں۔

پرویز الہی نے پریس کانفرس میں بارہا نواز شریف اور شہباز شریف کو کڑی تنقید کا نشانہ بنایا اور کہا کہ آٹھ سال جدہ کے سرور پیلس میں رہ کر اُنہوں نے محض سرور ہی حاصل کیا ہے۔

اُنہوں نے اس بات کو دہرایا کہ شریف بردران نے جلاوطنی سے کوئی سبق حاصل نہیں کیا ہے۔

اُن کے مطابق نون لیگ آئین اور قانون کی باتیں کرتی ہے لیکن شہباز شریف کس قانون کے تحت اسبلی کے ممبر نہ ہونے کے باوجود سرکاری افسران کو اپنے روبرو پیش کروا رہے ہیں اور اُن کے انٹرویو لے رہے ہیں۔

سابق وزیرِ اعلی کے بقول شریف برادران ضمنی انتخابات میں حصہ نہیں لے سکتے کیونکہ نواز شریف سزا یافتہ ہیں اور شہباز شریف نادہندہ ہیں اور ججوں کی بحالی سے زیادہ وہ اپنی بحالی کی فکر میں ہیں۔

پرویز الہی نے طنز کرتے ہوئے کہا کہ حکومت کو چاہیے تھا کہ وہ لوگوں کے مسائل پر توجہ دے لیکن ’پنجاب کی بچہ حکومت روزانہ صبح بارہ سے پندرہ افسران کے تبادلے کا ناشتہ کرتی ہے اور اس کے بغیر اُن کی روٹی نہیں ہضم ہوتی اور اُدھر لوگوں کو نہ تو روٹی ملتی ہے، نہ گیس اور نہ ہی بجلی ملتی ہے۔‘