ایک طالبان ترجمان نے دعویٰ کیا ہے کہ جھڑپ اس وقت شروع ہوئی جب اس کے جنگجوؤں نے ایک افغان فوجی چوکی پر حملہ کیا

اگرچہ اس بارے میں تفصیلات زیادہ واضح نہیں ہیں، تاہم طالبان تنظیم کے ایک ترجمان نے دعویٰ کیا ہے کہ جھڑپ اس وقت شروع ہوئی جب اس کے جنگجوؤں نے ایک افغان فوجی چوکی پر حملہ کیا۔

افغان صوبے کنڑ میں پولیس کے سربراہ عبدالجلال جلال کا کہنا ہے کہ اس جھڑپ میں پانچ افغان پولیس اہلکار ہلاک ہوئے ہیں۔

دوسری طرف پاکستان حکام کا کہنا ہے کہ اس کا ایک فوجی اس وقت ہلاک ہوا جب افغانستان کی طرف سے اس کی فوجی چوکی پر فائرنگ کی گئی۔

امریکی خبر رساں ادارے ایسوسی ایٹڈ پریس نے پاکستانی فوج کے ترجمان میجر جنرل اطہر عباس کے حوالے سے کہا ہے کہ جھڑپ پاکستانی قبائلی علاقے باجوڑ ایجنسی سے ملحقہ افغان سرحدی علاقے میں بدھ کے روز ہوئی۔ میجر جنرل اطہر عباس نے اسے ایک غلط فہمی کا نتیجہ قرار دیا۔

میجر جنرل اطہر عباس کے مطابق لڑائی اس وقت شروع ہوئی جب طالبان جنگجوؤں نے ایک افغان سرحدی چوکی پر حملہ کیا۔ ترجمان کے مطابق جوابی فائرنگ میں ایک پاکستانی چوکی بھی افغان فوج کی فائرنگ کی زد میں آ گئی جس سے ایک پاکستان فوجی ہلاک اور ایک زخمی ہو گیا۔

دونوں جانب سے یہ بھی دعویٰ کیا گیا کہ اس جھڑپ میں آٹھ طالبان جنگجو بھی ہلاک ہوئے۔

حالیہ سالوں میں پاک افغان سرحد پر پاکستانی اور افغان فوجوں کے درمیان متعدد مسلح جھڑپیں ہوئی ہیں۔

دونوں ملکوں کے مقامی کمانڈروں نے بدھ کے روز ہی سرحد پر کشیدگی کم کرنے کے لیے ایک ملاقات بھی کی ہے۔