نثار کھوکھر بی بی سی اردو ڈاٹ کام، سکھر

	عالم بلوچ قتل کیس میں سے بری ہونے کے بعد آصف زرداری کے خلاف قتل کا کوئی مقدمہ باقی نہیں رہا۔

آصف علی زرداری کے وکلاء نے عدالت کو آگاہ کیا کہ قتل کیس کو گیارہ برس سے زیادہ وقت گزر چکا ہے مگر کوئی گواہ پیش ہوا ہے نہ کسی پر فرد جرم عائد کی گئی ہے۔ وکلاء کےمطابق جس دن عالم بلوچ قتل ہوئے اس دن آصف علی زرداری جیل میں قید تھے۔

عدالت نے سرکاری وکیل احمد رضا صدیقی سے ان کا مؤقف معلوم کیا تو انہوں نے آصف زرداری کی بریت پر کوئی اعتراض نہیں کیا۔

عالم بلوچ کو اٹھارہ ستمبر انیس سو ستانوے میں حیدرآباد ہائی کورٹ سے واپسی پر قاسم آباد تھانے کی حدود میں وادھو واہ روڈ پر قتل کیا گیا تھا۔

مقتول عالم بلوچ کے کزن رمضان عالمانی نے ان کے قتل کا مقدمہ آصف زرداری ،ان کے والد حاکم زرداری او ران کے ساتھیوں اور محافظوں، شکور انصاری، لطیف انصاری، حفیظ انصاری، اللہ داد عرف پوڑھو زرداری، اللہ سایو زرداری، غلام نبی زرداری، ظفر میرانی اور زوار غلام حیدر کےخلاف قاسم آبادمیں درج کروایاتھا۔

حیدرآباد کی مقامی عدالت نے دو ہزار ایک میں حاکم زرداری کو عدالت میں ہر پیشی پر پیش نہ ہونے سے بری قرار دیا تھا۔

عالم بلوچ قتل کیس میں سے بری ہونے کے بعد آصف زرداری کے خلاف قتل کا کوئی مقدمہ باقی نہیں رہا۔ عالم بلوچ مرحوم اور آصف زرداری کے خاندان کےدرمیاں اختلافات کی بنیاد زرعی زمین قرار دی جا رہی ہے۔

عالم بلوچ کے بیٹے علی خان عالمانی نوشہروفیروز کے ضلعی نائب ناظم ہیں۔ آصف زرداری کی بریت کے حوالے سے ان کے بڑی بھائی عثمان اور علی سے رابطے کیے گئے مگر ان دونوں سے رابطے نہ ہوسکے۔