ہارون رشید بی بی سی اردو ڈاٹ کام، اسلام آباد

حکومت پاکستان نے دو برس قبل ’تاج محل‘ اور ’مغل اعظم‘ جیسی تاریخی فلموں کو سکریننگ کی خصوصی اجازت دی تھی۔ اس کے بعد سے اب تک پاکستانی سینسر بورڈ نے ایک درجن بھارتی فلموں کو نمائش کی اجازت دی تھی۔ یہ سب کی سب اب تک دکھائی جا چکی ہیں یا پھر دکھائی جا رہی ہیں۔

’آواراپن‘ ’گول‘ اور ’ویلکم‘ کے فورا بعد اب ’ریس‘ اور ’تارے زمین پر‘ پاکستانی شائقین کو محظوظ کر رہی ہیں۔ ’ریس‘ تاہم زیادہ فلم بینوں کو اپنی جانب کھینچ رہی ہیں کیونکہ یہ پہلی فلم ہے جو بھارت اور پاکستان میں بیک وقت پیش کی گئی۔

فلم سینسر بورڈ کے سربراہ اظفر شفقت نے بی بی سی سے بات کرتے ہوئے بتایا کہ جون دو ہزار چھ میں قانون میں ترمیم کے بعد پاکستان میں صرف وہ بھارتی فلمیں دکھائی جاسکتی ہیں جو بھارت سے باہر شوٹ کی گئی ہوں۔ فلم بنانے والا چاہے بھارتی ہو اور اس میں تمام کے تمام اداکار بھارتی ہوں لیکن اگر وہ بھارت سے باہر فلمائی گئی ہوں گی تو انہیں پاکستان میں نمائش کی اجازت دی جاسکے گی۔

ترمیمی قانون  جون دو ہزار چھ میں قانون میں ترمیم کے بعد پاکستان میں صرف وہ بھارتی فلمیں دکھائی جاسکتی ہیں جو بھارت سے باہر شوٹ کی گئی ہوں۔ فلم بنانے والا چاہے بھارتی ہو اور اس میں تمام کے تمام اداکار بھارتی ہوں۔ چئیرمین اظفر شفقت

سینسر بورڈ کے مطابق موجودہ وقت میں ان کے پاس کسی بھارتی فلم کی درخواست زیر غور نہیں ہے۔

بھارتی فلموں کی نمائش کی شرائط میں نرمی سے پاکستانی سینما گھروں کو مالی فائدہ ہو رہا ہے۔ بڑی تعداد میں شائقین نے اہل خانہ کے ہمراہ ان سینما گھروں کا دوبارہ رخ کیا ہے۔

پاکستانی فلم ’خدا کے لیے‘ کی آج کل بھارت میں نمائش سے توقع کی جا رہی ہے کہ پاکستانیوں کو مزید اچھی بھارتی فلموں کا مزا بڑی سکرین پر لوٹنے کے مواقع مل سکیں گے۔