مائیکل ہیڈن کا کہنا ہے کہ پاک افغان سرحدی صورتحال پاکستان اور امریکہ کے لیے خطرہ ہے

امریکی خبر رساں ادارے اے پی کے مطابق ان کا کہنا تھا کہ انٹیلیجنس ایجنسیوں کو اس بات کا یقین ہے کہ القاعدہ کے سربراہ اسامہ بن لادن پاک افغان سرحدی علاقوں میں موجود ہیں لہذا یہاں حملہ کرنا امریکہ کے مفاد میں ہے کیونکہ اگر امریکہ پر کوئی بھی اور حملہ کیا گیا تو اس کی منصوبہ بندی اسی علاقے میں ہوگی۔

مائیکل ہیڈن نے مزید کہا کہ ’مغربی علاقوں پر حملے کے لیے تربیت انہی علاقوں میں دی جا رہی ہے۔اور یہ لوگ شکل وشباہت میں مغربی باشندے ہی نظر آئیں گے لہذاہ وہ با آسانی امریکہ میں داخل ہوسکتے ہیں۔‘

مائیکل ہیڈن نےاس رپورٹ پر تبصرہ کرنے سے انکار کر دیا کہ ملک میں پرویز مشرف کا اثر کم ہونے کی صورت میں امریکہ پاکستان میں قبائلی علاقوں میں القاعدہ کے جنگجوؤں کے خلاف یکطرفہ کاروائی کر سکتا ہے۔البتہ ان کا کہنا تھا کہ قبائلی علاقے انتہائی حساس ہیں اور پاک افغان سرحدی صورتحال پاکستان، افغانستان، مغربی ممالک اور امریکہ کے لیے خطرہ ہے۔