عبادالحق بی بی سی اردو ڈاٹ کام، لاہور

	وکلا نے کتبے اور بینز اٹھا رکھے تھے جن پر چیف جسٹس کے حق میں اور صدر پرویز مشرف کے خلاف عبارتیں درج تھیں

وکلا تنظیموں کے فیصلے کی روشنی میں وکیلوں نے مکمل ہڑتال کی اور جلوس نکالے۔ وکلا کے احتجاج میں سیاسی جماعتوں کے کارکن، سول سوسائٹی کے ارکان اور طلبہ بھی شامل ہوئے۔

پنجاب کے صوبائی دارالحکومت لاہور میں ضلعی بار ایسوسی ایشن کے وکلا نے ایوان عدل سے جلوس نکالا جو پنجاب اسمبلی کے سامنے اختتام پذیر ہوا۔

وکلا کا جلوس جب جی پی او چوک پہنچا تو اس میں لاہور ہائی کورٹ بار ایسوسی ایشن کے ارکان بھی شامل ہوگئے۔

وکلا ’رہا کرایا ہے بحال بھی کرائیں گے‘، ’گو مشرف گو‘ اور ’چیف تیرے جان نثار بے شمار بے شمار‘ کے نعرے لگا رہے تھے۔

وکلا نے کتبے اور بینز اٹھا رکھے تھے جن پر معزول چیف جسٹس افتخار محمد چودھری کے حق میں اور صدر پرویز مشرف کے خلاف عبارتیں درج تھیں۔

پنجاب اسمبلی کے سامنے لاہور ہائی کورٹ بار ایسوسی ایشن کے صدر انور کمال نے خطاب کرتے ہوئے ارکان پارلیمان پر زور دیا کہ وہ وکلا سے تیس دنوں کی گنتی نہ کرائے بلکہ تیس دنوں سے پہلے عدلیہ کو بحال کر دیا جائے۔

وکلا اپنے رہنماؤں کی تقاریر کے بعد پرامن طور پر منشتر ہوگئے۔

ادھر کراچی میں وکلا نے ہائی کورٹ اور ماتحت عدالتوں کا بائیکاٹ کیا اور احتجاجی اجلاس منقعد کیے جن میں وکلا رہنماؤں نے خطاب کرتے ہوئے ججوں کی بحالی میں امریکی مداخلت کی مذمت کی۔ ان کا کہنا تھا کہ چیف جسٹس کی بحالی کے بعد ملازمت میں کسی قسم کی کمی کو قبول نہیں کیا جائے گا۔ احتجاجی اجلاس کے بعد وکلا نے سٹی کورٹ سے ایم اے جناح روڈ تک مارچ کیا۔

دوسری جانب سے سندھ ہائی کورٹ بار ایسوسی ایشن کے صدر رشید اے رضوی کی قیادت میں وکلا کے وفد نے جسٹس افتخار محمد چودھری سے ملاقات کی اور انہیں کراچی آنے کی دعوت دی۔

رشید رضوی کے بقول جسٹس افتخار محمد چودھری نے دعوت کو قبول کر لیا ہے، تاہم تاریخ کا اعلان کوئٹہ بار سے خطاب کے بعد کیا جائے گا۔

پشاور اور کوئٹہ میں وکلا نے احتجاج کرتے ہوئے عدالتوں کا بائیکاٹ کیا اور احتجاجی اجلاس کیے جن میں عدلیہ کی بحالی تک جدوجہد جاری رکھنے کا عزم کیا گیا۔