عبدالحئی کاکڑ بی بی سی اردوڈاٹ کام، پشاور

	مبینہ خودکش بمبار دیوار پھلانگ کر مینگورہ پولیس لائنز میں داخل ہونے کی کوشش کررہے تھے

ملاکنڈ ڈویژن کے ڈی آئی جی سید اختر علی شاہ نے بی بی سی کو بتایا کہ پیر کی رات تقریباً سات بجے ایک مبینہ خودکش بمبار دیوار پھلانگ کر مینگورہ پولیس لائنز میں داخل ہونے کی کوشش کررہے تھے کہ وہاں پر موجود پولیس اہلکاروں نے ان پر فائرنگ کی۔انکے بقول مبینہ خودکش بمبار نے خود کو ایک دھماکہ کے ساتھ اڑادیا جسکے نتیجے میں قریب موجود ایک سب انسپکٹر اور ایک اور پولیس اہلکر سمیت دو افراد ہلاک جبکہ پانچ دیگر زخمی ہوگئے ہیں۔

انہوں نے مزید بتایا کہ زخمیوں کو طبی امداد فراہم کرنے کے لیے مینگورہ ہسپتال منتقل کردیا گیا ہے۔عینی شاہدین کے بقول واقعہ کے بعد پولیس نے علاقہ کو گھیرے میں لیکر اس سے ہر قسم کی آمدروفت کے لیے بند کردیا ہے۔

واضخ رہے کہ سوات میں گزشتہ سال اکتوبر میں مقامی طالبان کیخلاف فوجی آپریشن کے شروع ہونے کےبعد وہاں پر بم اور خودکش حملوں کے واقعات میں اضافہ دیکھنے میں آیاہے جسکے نتیجے میں سکیورٹی فورسز کے درجنوں اہلکاروں کے علاوہ بڑی تعداد میں عام شہری بھی ہلاک ہوچکے ہیں ۔ اٹھائیس فروری کو بھی ڈی ایس پی کے جنازے پر ایک خودکش حملہ ہوا تھا جس میں چالیس سے زائد افراد ہلاک اور پینسٹھ زخمی ہوگئے تھے۔