عبدالحئی کاکڑ بی بی سی اردو ڈاٹ کام، پشاور

	پولیس ذرائع کے مطابق ڈی ایس پی کی گاڑی بارودی سرنگ کا نشانہ بنی

یہ حملہ حاجی بابا زیارت کے مقام پر ہوا جہاں صوبہ سرحد کے جنوبی ضلع لکی مروت میں جمعہ ہی کی صبح ایک بم دھماکے میں ہلاک ہونے والے ڈی ایس پی جاوید اقبال کی نمازِ جنازہ ادا کی جا رہی تھی۔ اس موقعہ پر وہاں لوگوں کی ایک بڑی تعداد جمع تھی۔

مقامی صحافی شیریں زادہ نے بی بی سی کو بتایا کہ خود کش حملے میں ہلاک ہونے والوں میں ڈی ایس پی جاوید اقبال کا جواں سال بیٹا بھی شامل ہے۔ شدید زخمی افراد کو پشاور منتقل کر دیا گیا ہے۔

ہسپتال کے حکام نے زخمیوں کے لیے خون کے عطیے کی اپیل کی ہے۔

موقع پر موجود ڈی ایس پی کرامت شاہ نے بی بی سی کو بتایا کہ جب ڈی ایس پی جاوید اقبال کا جنازہ ابھی ختم ہی ہوا تھا تو ایک زور دار دھماکہ ہوا جس کے بعد ہر طرف انسانی اعضا بکھرے نظر آ رہے تھے۔

	کئی زخمیوں کو مقامی ہسپتال میں طبی امداد فراہم کی گئی

سوات پولیس کے افسر واقف خان نے بی بی سی اردو ڈاٹ کام کو بتایا ہے کہ یہ ایک خودکش حملہ تھا۔ ہلاک ہونے والوں میں مینگورہ کے ایس ایچ او بھی شامل ہیں۔

ڈی ایس پی جاوید اقبال جمعہ کی صبح پولیس کی ایک گاڑی میں ہونے والے دھماکے کا نشانہ بنے تھے اور اس واقعے میں ان کے علاوہ مزید دو پولیس اہلکار ہلاک اور دو زخمی ہوگئے تھے جن کی حالت تشویشناک بتائی گئی ہے۔

پولیس کے بعض ذرائع کا کہنا ہے کہ یہ ایک بارودی سرنگ کا دھماکہ تھا اور دھماکے میں گاڑی مکمل طور پر تباہ ہوگئی۔

یاد رہے کہ لکی مروت شمالی جنوبی وزیرستان کے سنگم پر واقع ایک ضلع ہے جہاں پہلے بھی قانون نافد کرنے والے اور دیگر اداروں پر حملے ہوئے ہیں۔ اور تین ہفتے پہلے لکی مروت سے اٹامک انرجی کے تین اہلکاروں کو نامعلوم افراد نے اغواء کرلیا تھا جو ابھی تک بازیاب نہیں ہوئے ہیں۔