رفعت اللہ اورکزئی بی بی سی اردو ڈاٹ کام، پشاور

	صوبہ سرحد میں پولیس اہلکاروں کو کئئ حملوں میں نشانہ بنایا گیا ہے

کوہاٹ میں پولیس ذرائع کے مطابق یہ واقعہ جمعہ کو صبح سویرے شہر کے جنوب میں تقریباً پچیس کلومیٹر دور واقع لاچی کے مقام پر پیش آیا۔

تھانہ شکر درہ کے ایک پولیس اہلکار امان اللہ نے بی بی سی کو بتایا کہ نامعلوم مسلح افراد نے شکر درہ سڑک پر واقع عالم شہید پولیس چوکی پر دستی بم سے حملہ کیا۔ دھماکے سے چوکی کے ایک کمرے میں موجود پانچ پولیس اہلکار زخمی ہوگئے۔ زخمیوں کو کوہاٹ شہر منتقل کیا گیا ہے۔

واقعہ کے بعد اعلیٰ پولیس اہلکار موقع پر پہنچے اور سارے علاقے کو گھیرے میں لے لیا جبکہ سڑک پر گاڑیوں کی آمد و رفت بھی کچھ وقت کےلیے بند کردی گئی۔

پولیس ذرائع کے مطابق بم ڈسپوزل سکواڈ کے اہلکاروں نے جائے وقوعہ سے بم کے نمونے حاصل کر کے تفتیش شروع کردی ہے۔

واضح رہے کہ کچھ عرصہ سے صوبہ سرحد کے جنوبی اور شمالی اضلاع میں پولیس اہلکاروں کو نشانہ بنانے کے واقعات میں اضافہ ہوا ہے۔ سرحد کے اعلٰی پولیس اہلکاروں کا خیال ہے کہ ان واقعات میں منظم جرائم پیشہ گروہ ملوث ہے جنہیں بعض بیرونی ممالک کی مدد حاصل ہے۔