ارمان صابر بی بی سی اردو ڈاٹ کام، کراچی

	آصف زرداری کو بدعنوانی کے کیسوں میں قومی مفاہمتی آرڈیننس کے تحت سہولت فراہم کی گئی ہے

یہ مقدمہ ایڈیشنل سیشن جج شرقی مسز نسیم منصور کی عدالت میں زیرِسماعت ہے اور گزشتہ سماعت کے موقع پر عدالت نے آصف علی زرداری کو طلب کیا تھا۔ سنیچر کو آصف علی زرداری کے وکیل شہادت اعوان ایڈووکیٹ نے عدالت میں اپنے مؤکل کی جانب سے ایک درخواست دائر کی جس میں استدعا کی گئی تھی کہ آصف زرداری کو سیاسی مصروفیات کی بناء پر بارہ اپریل تک عدالت میں حاضر ہونے سے مستثنیٰ قرار دیا جائے۔

انہوں نے عدالت کو بتایا کہ اس وقت ان کے مؤکل اسلام آباد میں مختلف سیاسی جماعتوں کے رہنماؤں سے مشاورت، معزول ججوں کی بحالی کی حکمتِ عملی کے تعین، حقیقی جمہوریت کی بحالی اور عدلیہ کو انتظامیہ سے علٰیحدہ کرنے کے بارے میں لائحہ عمل طے کرنے میں مصروفِ کار ہیں لہذٰا وہ عدالت میں حاضر نہیں ہوسکتے۔

عدالت نے ان کی درخواست کو منظور کرتے ہوئے سماعت بارہ اپریل تک ملتوی کردی اور اگلی سماعت پر آصف علی زرداری کو طلب کیا ہے۔

سابق وزیراعظم بینظیر بھٹو کے بھائی اور پاکستان پیپلز پارٹی شہید بھٹو گروپ کے سربراہ میر مرتضی بھٹو بیس ستمبر انیس سو چھیانوے کو اپنے سات ساتھیوں سمیت پولیس فائرنگ میں ہلاک ہوگئے تھے۔

اس قتل میں اس وقت کی وزیر اعظم بینظیر بھٹو کے شوہر آصف علی زرداری، سابق وزیر اعلیٰ عبداللہ شاہ، ڈی آئی جی کراچی شعیب سڈل، سمیت کئی پولیس افسران و دیگر افراد ملزم قرار دیئے گئے تھے۔