ارمان صابر بی بی سی اردو ڈاٹ کام، کراچی

	ملزمان نے ادارہ امن و انصاف کے دفتر میں سات افراد کو قتل کیا تھا۔

پولیس نے ملزمان کے نام زبیرالدین عرف شرجیل، آصف اور عاطف بتائے ہیں۔

پولیس کا کہنا ہے کہ ان ملزمان نے سات سال قبل ایم اے جناح روڈ پر واقع رمپا پلازہ میں قائم ادارہ امن و انصاف کے دفتر میں سات افراد کو قتل کیا تھا۔ادارۂ امن و انصاف کراچی میں عیسائی مذہب سے تعلق رکھنے والے افراد کے زیرِ انتظام چلایا جاتا ہے۔

پولیس نے یہ بھی دعویٰ کیا ہے کہ گرفتار ہونے والے افراد نے افغان جہاد میں حصہ لیا تھا لیکن القاعدہ یا طالبان سے ان کے تعلق کا اب تک ثبوت نہیں ملا ہے۔ حکام کے مطابق ان افراد نے اپنا نیا گروپ تحریکِ اسلامی لشکرِ محمدی کے نام سے بنایا تھا جسے برطانیہ سے آنے والا عامر حسان نامی پاکستانی شخص مالی مدد دے رہا تھا۔

ان افراد نے اپنا نیا گروپ تحریکِ اسلامی لشکرِ محمدی کے نام سے بنایا تھا جسے برطانیہ سے آنے والا عامر حسان نامی پاکستانی شخص مالی مدد دے رہا تھا۔

سی آئی ڈی پولیس کے ایس پی راجہ عمر خطاب نے منگل کو بی بی سی کو بتایا کہ ان ملزمان نے سنہ دو ہزار دو میں اپنی کارروائیاں شروع کی تھیں اور یہ اسی ادارے کے چئرمین سمیت مزید کئی افراد کے قتل میں بھی ملوث ہیں۔

انہوں نے بتایا کہ ان وارداتوں کے بعد اس گروپ نے اپنی سرگرمیاں معطل کردی تھیں اور روپوشی اختیار کرلی تھی۔ لیکن گزشتہ برس یہ گروپ دوبارہ فعال ہوگیا اور مزید چند افراد کو قتل کیا۔ انہوں نے کہا کہ اس گروپ کا مقصد غیر مسلم غیر سرکاری تنظیموں کو پاکستان میں کام کرنے سے روکنا تھا اور اسی لئے وہ دہشت پھیلا کر اپنے مقصد میں کامیاب ہونے کی کوشش کر رہے تھے۔

سی آئی ڈی پولیس کا دعویٰ ہے کہ یہ گروپ اٹھارہ افراد پر مشتمل تھا اور گذشتہ سال انہوں نے اپنے گروپ کو تحریکِ اسلامی لشکرِ محمدی کا نام دیا تھا۔

پولیس کے مطابق گروپ کے اٹھارہ میں سے پندرہ ملزمان گرفتار ہوچکے ہیں جبکہ پولیس تین مفرور ملزمان کی گرفتاری کے لیے کوشش کررہی ہے جن میں اس گروپ کو مالی امداد فراہم کرنے والا عامر حسان بھی شامل ہے۔