عزیز اللہ خان بی بی سی اردو ڈاٹ کام، کوئٹہ

	محکمہ تعلیم کے افسر کی بازیابی کے لیے جمعہ کو علاقے میں کارروائی کی گئی تھی

قلعہ عبداللہ کا علاقہ چمن اور کوئٹہ کے درمیان واقع ہے جہاں سنیچر کی صبح سے مقامی لوگوں نے سڑک کو آمد و رفت کے لیے بند کر رکھا تھا اور پولیس کی کارروائی کے خلاف احتجاج کر رہے تھے۔

قلعہ عبداللہ کے پولیس افسر وزیر خان ناصر نے بتایا ہے کہ سنیچر کی صبح ایس پی سلیم مروت چمن سے کوئٹہ مظاہرین سے بات کرنے گئے تو انہیں اسلحہ کے زور پر محافظوں سمیت اغواء کر لیا گیا ہے۔

وزیر خان ناصر کے مطابق سلیم مروت کی بازیابی کے لیے کوششیں کی جا رہی ہیں۔

چمن سے آمدہ اطلاعات کے مطابق پولیس کی کرائمز برانچ نے جمعہ کو محکمہ تعلیم کے افسر کی بازیابی کے لیے اسی علاقے میں کارروائی کی تھی اور کچھ افراد کو گرفتار کیا تھا۔

لوگوں نے بتایا ہے کہ سنیچر کا مظاہرہ انہی افراد کی بازیابی کے لیے کیا جا رہا تھا کہ اس دوران ایس پی سلیم مروت وہاں پہنچے جنہیں تین محافظوں سمیت اغواء کر لیا گیا ہے۔

اس کے علاوہ پولیس نے کوئٹہ میں ٹریفک پولیس پر حملے کے حوالے سے کم سے کم سات مشتبہ افراد کو گرفتار کیا ہے جن سے پولیس حکام کے مطابق پوچھ گچھ کی جا رہی ہے۔

جمعہ اور جمعرات کی کارروائیاں  جمعہ کو سوئی میں اٹھارہ انچ قطر کی ایک پائپ لائن کو دھماکے سے اڑا دیا گیا اور جمعہ کی رات ڈیرہ بگٹی اور جعفر آباد کے سرحدی علاقے دیناری پٹ میں پولیس کی ایک چوکی پر راکٹوں اور دیگر اسلحے سے حملہ کیا گیا ہے

ادھر جمعہ کو نامعلوم افراد نے سوئی میں اٹھارہ انچ قطر کی ایک پائپ لائن کو دھماکے سے اڑا دیا تھا اور جمعہ کی رات ڈیرہ بگٹی اور جعفر آباد کے سرحدی علاقے دیناری پٹ میں پولیس کی ایک چوکی پر راکٹوں اور دیگر اسلحے سے حملہ کیا گیا ہے جس میں کسی جانی نقصان کی تصدیق نہیں ہو سکی۔

خود کو ایک اور مسلح کالعدم تنظیم بلوچ ریپبلکن آرمی کا ترجمان ظاہر کنے والے سرباز بلوچ نامی شخص نے ٹیلیفون پر ان حملوں کی ذمہ داری اپنی تنظیم کی جانب سے قبول کی ہے۔