پنجاب میں مسلم لیگ نواز نے اہم کامیابیاں حاصل کی ہیں

پنجاب
غیر حتمی مکمل نتائج کےمطابق پنجاب میں دوسوستانوے میں سے دو سو چھیاسی نشستوں کےنتائج مل چکے ہیں۔ مسلم لیگ نواز نے ابھی تک پنجاب اسمبلی میں ایک سو دو نشتیں حاصل کی ہیں جبکہ پاکستان پیپلز پارٹی پارلیمنٹیرین چھہتر نشستیں حاصل کر چکی ہے۔ پاکستان مسلم لیگ قاف نے پنجاب اسمبلی کی ابھی تک تریسٹھ نشتیں حاصل کی ہیں۔ پنجاب اسمبلی میں پینتیس آزاد امیدوار بھی کامیاب ہوئے ہیں جبکہ ایم ایم اے کو ابھی تک صرف ایک نشست ملی ہے۔

بلوچستان
رقبے کے لحاظ سے سب سے بڑے صوبے بلوچستان کی اکیاون نشستوں میں سے پینتالیس نشستوں کے نتائج ملے چکے ہیں جس کے مطابق پاکستان مسلم لیگ قاف سترہ نشستوں کے ساتھ پہلے نمبر پر ہے۔

بلوچستان اسمبلی پاکستان پیپلز پارٹی نے سات، بی این پی چار، متحدہ مجلس عمل چھ اور اے این پی نے ایک نشست حاصل کی ہے۔ بلوچستان سے دس آزاد امیدوار کامیاب ہو چکے ہیں۔

سرحد
سرحد اسمبلی کی ننانوے نشتوں میں سے اٹھاسی کے نتائج آ چکے ہیں جس کے مطابق عوامی نیشنل پارٹی کو انتیس سیٹوں سے تمام جماعتوں پر واضح برتری حاصل ہے۔

عوامی نیشنل پارٹی نے چوون میں سے انتیس نشستیں حاصل کر کےسب آگے ہیں۔ پاکستان پیپلز پارٹی صوبہ سرحد میں ابھی تک سترہ نشستوں پر کامیابی حاصل کی ہے۔ آفتاب خان شیر پاؤ کی جماعت پی پی شیرپاؤ نے پانچ نشتیں حاصل کی ہیں۔

پاکستان مسلم لیگ قاف کو تین جبکہ حکمران جماعت متحدہ مجلس عمل کو صرف پانچ نشتیں ملی ہیں۔سترہ آزاد امیدوار بھی کامیاب رہے ہیں

	پاکستان پیپلز پارٹی نے سندھ میں اہم کامیابیاں حاصل کی ہیں

سندھ اسمبلی
آبادی کے لحاظ سے دوسرے بڑے صوبے میں پیپلز پارٹی سب سے آگے ہے۔ سندھ کی ایک سو تیس میں سے ایک سو چوبیس حلقوں کے نتائج کا اعلان ہو چکا ہے جس کے مطابق پاکستان پیپلزپارٹی سڑسٹھ نشستیں حاصل کر چکی ہے۔

متحدہ قومی موومنٹ نے شہری علاقوں میں اپنے غلبے کو برقرار رکھا ہے اور ابھی تک اڑتیس نشستیں حاصل کی ہیں۔پاکستان مسلم لیگ قاف نے نو جبکہ اے این پی نے دو، مسلم لیگ فنکشنل نے سات نشستیں حاصل کی ہیں۔