شہزاد ملک بی بی سی اردو ڈاٹ کام، اسلام آباد

	راولپنڈی اور اسلام آباد میں پاکستان مسلم لیگ (ن) نے کامیابی حاصل کر لی ہے۔

غیرسرکاری نتائج کے مطابق راولپنڈی اور اسلام آباد میں پاکستان مسلم لیگ (ن) نے کامیابی حاصل کر لی ہے۔

سینٹرل پنجاب میں پاکستان مسلم لیگ نواز اکثریت حاصل کر رہی ہے جبکہ پانچ سال تک برسراقتدار رہنے والی مسلم لیگ قائداعظم گروپ کے امیدوار ان انتخابات میں بری طرح ناکام ہو رہے ہیں۔

حلقہ این اے ایک سو گیارہ میں پیپلز پارٹی کی امیدوار ڈاکٹر فردوس عاشق اعوان نے غیرسرکاری نتائج کے مطابق قومی اسمبلی کے سپیکر چودھری امیر حسین کو شکست کا سامنا ہے جبکہ حلقہ این اے ایک سو بارہ جہاں سے پاکستان مسلم لیگ قائداعظم گروپ کے سربراہ چودھری شجاعت حسین انتخابات میں حصہ لے رہے تھے، انہیں مسلم لیگ (ن) کے رانا عبدالستار نے بیس ہزار کے قریب ووٹوں سے شکست دی ہے۔

مسلم لیگ قائداعظم گروپ کو ایک اور دھچکا لگا جب وزیرآباد سے قومی اسمبلی کے امیدوار چودھری حامد ناصر چٹھہ کو مسلم لیگ (ن) کے جسٹس (ر) افتخار چیمہ نے شکست دی۔

حلقہ این اے ایک سو تیرہ سے مسلم لیگ (ن) کے امیدوار مرتضٰے امین نے مسلم لیگ (ق) کے امیدوار اور سابق وزیر مملکت برائے دفاع اسجد ملہی کو شکست دی۔ سیالکوٹ سے پاکستان مسلم لیگ (ن) کے خواجہ آصف نے مسلم لیگ (ق) کے میاں ریاض کو شکست دی۔

اب تک کے نتائج کے مطابق گوجرانوالہ شہر کی قومی اسمبلی کی دو سیٹوں پر پاکستان مسلم لیگ (ن) کے امیدوار عثمان ابراہیم اور خرم دستگیر کامیاب ہو رہے ہیں جبکہ کامونکی سے مسلم لیگ (ن) کے امیدوار رانا نذیر احمد نے مسلم لیگ (ق) کے امیدوار اور سابق صوبائی وزیر رانا شمشاد کو شکست دی۔

واضح رہے کہ رانا نذیر احمد نے پہلے مسلم لیگ (ق) کی ٹکٹ حاصل کی تھی لیکن جب نواز شریف واپس آئے تو انہوں نے مسلم لیگ (ق) کو یہ ٹکٹ واپس کرکے مسلم لیگ (ن) سے قومی اسمبلی کا ٹکٹ حاصل کیا۔