عبادالحق بی بی سی اردو ڈاٹ کام، لاہور

	انتخابات میں پیپلز پارٹی اور مسلم لیگ نواز دونوں کو پچھتاوے کے سوا کچھ نہیں ملے گا:اے پی ڈی ایم رہنما

لیاقت بلوچ کا کہنا ہے کہ اٹھارہ فروری کوہونے والےانتخابات کے بائیکاٹ کے لیےعوامی رابطہ مہم جاری ہے اور اس ضمن میں پورے ملک میں اے پی ڈی ایم نے جلسے کیے ہیں جبکہ اسی کڑی کا آخری جلسہ سولہ فروری کو انتخابات سے دو دن پہلے لاہور میں مینار پاکستان کے مقام پر ہوگا۔ان کا کہنا ہے کہ حکومت نے ان کو جلسہ کرنے کی اجازت دے دی ہے۔

ان کے بقول جلسے کے لیے تمام انتظامات کو مکمل کرلیا گیا ہے اور قاضی حسین احمد، محمود خان اچکزئی اور عمران خان سمیت دیگر رہنما جلسے سے خطاب کریں گے۔

انہوں نے پیپلز پارٹی اور مسلم لیگ (ن) پر نکتہ چینی کی اور کہا کہ یہ دونوں جماعتیں انتخابات میں حصہ لینے کے تمام مراحل سے گزرنے کے بعد پچھتا رہی ہیں اور دونوں جماعتیں اپنی روایتی سیاسی بنیادوں کو چھوڑ کر اپنی غلطیوں پر پردہ ڈالنے کے لیے اکٹھے ہونے کی بات کر رہی ہیں۔ان کے بقول انتخابات میں پیپلز پارٹی اور مسلم لیگ نواز دونوں کو پچھتاوے کے سوا کچھ نہیں ملے گا۔

لیاقت بلوچ کاکہنا ہے کہ مسلم لیگ نواز اس بات کا پہلے بھی تجربہ کرچکی ہے کہ پیپلز پارٹی نے میثاق جمہوریت، اے آر ڈی کے چارٹراور لندن میں ہونے والی کل جماعتی کانفرنس کے مشترکہ موقف سے انحراف کر کے نواز شریف کو تنہا چھوڑ دیا۔ ان کے بقول اب بھی یہ سٹیج مکمل طور پر تیار ہے اور پیپلز پارٹی، مسلم لیگ قاف اور ایم کیو ایم کو ملا کر امریکی ایجنڈے کی تکمیل کے لیے حکومت سازی کی جائے گی۔

پریس کانفرنس میں پختونخواہ ملی عوامی پارٹی کے رہنما رضا محمد نے کہا کہ انتخابات میں حصہ لینے والی جماعتوں کی اکثریت احتجاج کے لیے ہمارے ساتھ سڑکوں پر ہوگی۔