ریاض سہیل بی بی سی اردو ڈاٹ کام، کراچی

	دھماکے میں ڈیڑھ سو کے قریب افراد ہلاک ہوئے تھے

اٹھارہ اکتوبر کو وطن واپسی پر پاکستان پیپلز پارٹی کی سربراہ بینظیر بھٹو پر پہلا قاتلانہ حملہ ہوا تھا، جس میں وہ محفوظ رہی تھیں مگر ڈیڑھ سو کے قریب افراد ہلاک اور کئی درجن زخمی ہوگئے تھے۔

ہلاک ہونے والوں میں سے کئی افراد ایسے تھے جن کی شناخت نہیں ہوسکی تھی مگر بعد میں دور دراز سے لواحقین آتے رہے اور شناخت ہوتی رہی مگر اب بھی بیس کے قریب لاشیں ناقابلِ شناخت ہیں اور ایدھی سرد خانے میں موجود ہیں۔

ایدھی فاؤنڈیشن کے اہلکار انور کاظمی کا کہنا ہے کہ’حکومت کو دو مرتبہ لکھ چکے ہیں کہ ان کی تدفین کی جائے یا اجازت دی جائے مگر ابھی تک کوئی جواب نہیں ملا ہے‘۔

پاکستان پیپلز پارٹی کی مقتول چئرپرسن بینظیر بھٹو نے ایک پریس کانفرنس میں کہا تھا کہ یہ نامعلوم افراد لاوارث نہیں ہیں ان کی تدفین گڑھی خدا بخش میں ان کے آبائی قبرستان میں کی جائے گی مگر اس فیصلے پر عمل درآمد سے قبل ہی وہ خود ہلاک ہوگئیں۔

پاکستان پیپلز پارٹی کا کہنا ہے کہ ابھی تک اس کے کچھ کارکن لاپتہ ہیں جن کی نشاندہی کے لیے حکومت سے رابطہ کیا گیا، جس کے بعد کچھ لاپتہ افراد اور ان کے لواحقین اور ہلاک ہونے والوں کے ڈی این اے ٹیسٹ بھی کرائے گئے مگر تمام کے ڈی این اے ٹیسٹ نہیں ہو سکے ہیں۔

پاکستان پیپلز پارٹی کی مقتول چئرپرسن بینظیر بھٹو نے ایک پریس کانفرنس میں کہا تھا کہ یہ نامعلوم افراد لاوارث نہیں ہیں ان کی تدفین گڑھی خدا بخش میں ان کے آبائی قبرستان میں کی جائے گی مگر اس فیصلے پر عمل درآمد سے قبل ہی وہ خود ہلاک ہوگئیں۔

پیپلز پارٹی کراچی کے رہنما رشاد ربانی کا کہنا تھا ’جب بھی کہیں کوئی بم دھماکہ ہوتا ہے تو متاثرین کو حکومت زرِ تلافی ادا کرتی ہے مگر ان ڈیڑھ سو لوگوں کے ورثاء کو ایک پیسہ بھی نہیں دیا گیا ہے، کیا یہ پاکستان کے شہری نہیں تھے‘۔

دوسری جانب کراچی پولیس سربراہ نیاز احمد صدیقی کا کہنا ہے کہ ان کے علم میں نہیں ہے کہ ایدھی حکام نے تدفین کے لیے خط لکھا ہے وہ اس بارے میں معلومات حاصل کریں گے۔

واضح رہے کہ اٹھارہ اکتوبر کو پیش آنے والے واقعہ کی تحقیقات میں کوئی پیشرفت نہیں ہوئی ہے تاہم حکومت کی جانب سے بنائے گئے تحقیقاتی ٹریبونل نے بیان ریکارڈ کیے ہیں مگر پاکستان پیپلز پارٹی نے اس کا بائیکاٹ کیا ہے اور اس کے خلاف سندھ ہائی کورٹ میں پٹیشین دائر کی ہوئی ہے۔