بیورو رپورٹ بی بی سی اردو ڈاٹ کام، اسلام آباد

	جمہوریت کا بھوت تو پاکستانی عوام پر بھی سوار ہے : نواز شریف

انہوں نے یہ بات انہوں نے جمعے کو راولپنڈی میں وکلاء سے خطاب کے دوران کہی۔ ان کا کہنا تھا کہ صدر کے اعلان کے برعکس ہنگامی حالت کا خاتمہ اس وقت ہوگا جب چیف جسٹس افتخار محمد چوہدری کی بحالی کا اعلان ہوگا۔

نواز شریف نے وکلاء کو بتایا کہ چھ فروری کو ’یوم عہد’ کے موقع پر مسلم لیگ (ن) کے قومی و صوبائی اسمبلی کے امیدواروں سے یہ حلف لیا جائے گا کہ وہ منتخب ہونے کے بعد عدلیہ کے بحالی کے لیے خود کو وقف کر دیں گے۔

صدر پرویز مشرف کے اس بیان پر کہ مغربی ممالک پر جمہوریت کا بھوت سوار ہے، نواز شریف نے کہا کہ ایسا بھوت تو پاکستانی عوام پر بھی سوار ہے۔ انہوں نے اس امید کا اظہار کیا کہ وہ دن دور نہیں جب سب گرفتار سیاسی کارکن اور وکلاء رہا ہوں گے۔

مسلم لیگ کے سربراہ نے وکلاء اور صحافیوں کو عدلیہ کی جنگ لڑنے پر خراج تحسین پیش کیا۔ ان کا کہنا تھا کہ تمام لوگوں کو اس تحریک میں شامل ہونا چاہیے۔

نواز شریف نے الزام لگایا کہ مشرف حکومت اٹھارہ فروری کے عام انتخابات میں دھاندلی کرے گی۔ ان کا موقف تھا کہ اگر انتخابات صاف اور شفاف ہوئے تو مسلم لیگ (ق) کو شکست ہوگی۔

اس سے قبل جعمرات کو یورپی یونین کے ایک اٹھارہ رکنی وفد سے فرانسیسی سفیر کی رہائش گاہ پر باتیں کرتے ہوئے نواز شریف نے انتخابات میں دھاندلی سے متعلق خدشات کا اظہار کیا۔ انہوں نے یورپی سفارت کاروں پر واضع کیا کہ پاکستانی عوام جہوریت چاہتے ہیں۔

اس ملاقات کے بعد امریکی سفیر این پیٹرسن نے بھی نواز شریف سے ملاقات کی جس میں مسلم لیگ نواز کے مطابق دونوں ممالک کے درمیان تعلقات پر بات چیت ہوئی۔