علی سلمان بی بی سی اردو ڈاٹ کام، لاہور

	نواز شریف کا الزام ہے کہ انتخابات آزادانہ نہیں ہوں گے

ان کے بقول یہ سب انتہائی گندی پالیسیوں کا نتیجہ ہے۔’ ہماری فوج اپنے ہی گھر میں لڑ رہی ہے۔‘

میاں نواز شریف نے ڈاکٹروں کی تنظیم پاکستان میڈیکل ایسوسی ایشن کی ایک تقریب سے خطاب کرتے ہوئے کہا کہ پاکستان جل رہا ہے، ہر طرف کشت و خون ہے، قبائلی علاقوں میں فوج تعینات ہے، کچھ سمجھ نہیں آتی ہے کہ کیا ہورہا ہے؟

سابق وزیر اعظم نے موجودہ حکمرانوں پر بین الاقوامی دباؤ کا اپنے دور سے موازانہ کرتے ہوئے کہا کہ ’ہمیں بھی امریکی صدر نے پانچ فون کیے، دو فون ٹونی بلیئر سے کروائے لیکن ہم نے پاکستان کوایٹمی طاقت بنانے کا فیصلہ کیا۔‘

فوجی وردی پہن کر ان کی ٹانگیں لرزتی تھیں اور اس کے مقابلے میں اگر بطور ایک سول حکمران ہم اصولی موقف اختیار نہ کرتے تو پاکستان کبھی ایک ایٹمی طاقت نہ بنتا نواز شریف

سابق وزیر اعظم نے کہا کہ پاکستانی کابینہ کی ڈیفنس کمیٹی میں ایسے بھی جرنیل تھے جن کے سامنے جب یہ بات رکھی گئی کہ ہندوستان کے ایٹمی دھماکوں کے جواب میں پاکستان کو بھی ایٹمی دھماکے کرنے ہیں تو ان کی ٹانگیں کانپنے لگیں۔

’فوجی وردی پہن کر ان کی ٹانگیں لرزتی تھیں اور اس کے مقابلے میں اگر بطور ایک سول حکمران ہم اصولی موقف اختیار نہ کرتے تو پاکستان کبھی ایک ایٹمی طاقت نہ بنتا۔‘

انہوں نے کہا اگر پاکستان جمہوری ٹریک پر رہتا اور پاکستان میں آئینی حکومت رہتی اور فوج اپنی حدود سے تجاوز کرکے سیاست میں داخل نہ ہوتی تودنیا میں کسی کی یہ جرآت نہ ہوتی کہ وہ پاکستان کے ایٹمی اثاثوں کی طرف انگلی اٹھاتا۔

	امریکی دباؤ کے باوجود جوہری دھماکے کیے

انہوں نے کہا کہ آج یہ بحث عام ہے کہ پاکستان کا مستقبل کیاہوگا؟ اٹھارہ فروری کے الیکشن ہوں گے بھی یا نہیں ہونگے؟ اٹھا رہ فروری کے بعد کیا ہوگا؟

میاں نواز شریف نے کہا کہ وہ پاکستان کی سڑکوں پر اور پارلیمنٹ میں پہنچ کر صدر مشرف کامقابلہ کریں گے اور کوشش کرکے مشرف کے تین نومبر کے اقدامات کی پارلیمان سے توثیق نہ ہونے دیں گے۔

سابق وزیر اعظم نے کہا کہ ان کے منشور کا اولین نکتہ ہے کہ عدلیہ بحال کی جائے اور سیاست سے پاکستانی فوج کا کردار ختم کیا جائے۔

میاں نواز شریف نے کہا کہ اگر وہی عدلیہ بحال ہوتی ہے تو آئندہ آنے والے مارشل لاء کو خود وہ سنبھالے گی۔ آرٹیکل سکس کا بھی فیصلہ کرے گی اور خود ہی یہ فیصلہ کرے گی کہ کس نے یہ مارشل لاء لگایا ہے کیوں لگایا ہے اور جس نے لگایا اس کے خلاف آئین کی دفعہ چھ کے تحت کارروائی ہونی چاہیے۔ میاں نواز شریف نے کہا کہ اسی طریقے سے ہم فوج کا سیاست میں راستہ روک سکیں گے۔

انہوں نے کہا کہ ملک میں قانون کی بالادستی کے لیے پوری قوم کو مل کر جدوجہد کرنا ہوگی اور تمام سیاسی جماعتوں کو مل کر ایک فیصلہ پر پہنچنا ہوگا۔ اس میں تاخیر ملک کے لیے بہتر نہیں ہے۔