ارمان صابر بی بی سی اردو ڈاٹ کام، کراچی

	ہنگاموں کے دوران سب سے زیادہ نقصان صوبۂ سندھ میں ہوا

انشورنس کمپنیوں کی نمائندہ تنظیم نے اپنے ممبران سے رائے مانگی ہے کہ کیا موجودہ پالیسی ہولڈروں سے ایک ہزار روپے زائد وصول کرنے سے نقصانات کے کلیم کی رقم دینے میں کمپنیوں کو مالی مشکلات پر قابو پانے میں مدد مل سکتی ہے۔

انشورنس کمپنیوں نے اب تک کے تخمینے کے مطابق آٹھ سے دس ارب روپے نقصان کا اندازہ لگایا ہے جس کی ادائیگی متاثرہ پالیسی ہولڈروں کو کرنا پڑے گی۔

انشورنس ایسوسی ایشن آف پاکستان نے اپنی ممبر کمپنیوں کو تجویز دی ہے کہ موجودہ پالیسی ہولڈروں سے ایک ہزار روپے زیادہ رقم پریمیم کی مد میں وصول کرنے سے انشورنس کمپنیوں کو نقصانات کے کلیم کی رقم دینے میں اپنی مالی مشکلات پر قابو پانے میں مدد مل سکتی ہے۔

انشورنس تجویز  مستقبل میں جتنے بھی پالیسی خریدنے کے خواہشمند حضرات ہیں ان کو آفر دی جائے کہ اگر وہ دہشت گردی یا ہنگاموں میں اپنی گاڑی کے نقصان کی صورت میں کوریج چاہتے ہیں تو کار مالکان کو ایک ہزار روپے اور موٹرسائیکل مالکان کو دو سو روپےمزید ادا کرنے ہوں گے۔ یہ تجویز ابھی زیرِغور ہے اور اس کا اطلاق تاحال نہیں ہوا ہے۔ محمد غفار

نقصانات کے تخمینے کے بارے میں انہوں نے کہا کہ اب تک تو انشورنس کمپنیاں نقصانات کے بارے میں معلومات جمع کر رہی ہیں کیوں کہ انشورنس کرانے والے پالیسی ہولڈروں کا نیٹ ورک بہت بڑا ہے اور اس میں ابھی وقت لگے گا۔

انہوں نے کہا کہ جیسے جیسے کلیم داخل کرائے جارہے ہیں اسی طرح اسے ترتیب میں بھی لایا جارہا ہے لیکن اس وقت کل نقصانات کے بارے میں کچھ نہیں کہا جاسکتا۔ انشورنس کمپنیوں کو خدشہ ہے کہ انشورنس والی املاک کے کلیم دس ارب روپے سے زیادہ ہوسکتے ہیں۔

ہنگاموں کے دوران سب سے زیادہ نقصان کراچی سمیت صوبہ سندھ میں ہوا ہے جہاں گاڑیوں کے علاوہ بینک برانچیں، کارخانے، پیٹرول پمپ، ریلوے کی املاک اور دیگر سرکاری عمارتوں کو نقصان پہنچایا گیا ہے یا جلایا گیا ہے۔ حکومت نےاب تک تین دن کے ہنگاموں کے دوران ہونے والے نقصانات کا تخمینہ اسّی ارب سے سو ارب روپے لگایا ہے جس میں سب سے زیادہ یعنی پچاس ارب روپے سے زیادہ کا نقصان صرف ریلوے کی تنصیبات کو پہنچایا گیا ہے جس کی انشورنس بھی نہیں تھی۔