ارمان صابر بی بی سی اردو ڈاٹ کام، کراچی

	اندرونِ سندھ کئی علاقوں میں دوبارہ کشیدگی پیدا ہوگئی ہے اور ٹرک چلنا بند ہوگئے ہیں

ڈیڑھ کروڑ آبادی کے اس شہر میں گزشتہ چار دنوں کی طرح پیر کو بھی خوف و دہشت کا راج رہا اور روز مرہ اشیاء کی قیمتیں آسمان سے باتیں کرتی رہیں۔ ہنگامہ آرائی کے باعث بازار اور دکانیں بند رہیں۔ جو کاروبار گھنٹوں کے لیے کھلتے ہیں انہیں بھی طاقت کے بل پر بند کرایا جا رہا ہے اور سامان کی ترسیل میں شدید مشکلات درپیش ہو رہی ہے۔

سبزی منڈی پیر کو تین روز کے بعد کھلی لیکن فلاحی انجمن ہول سیل ویجیٹیبل ایسوسی ایشن کے نائب صدر وقار احمد نے کہا کہ سامان کی ترسیل اسی صورت میں ممکن ہو سکے گی جب حکومت انہیں نقصان کی تلافی کرے ۔انہوں نے کہا کہ سبزی منڈی میں پھنسے ہوئے ٹرک سبزی لے کر آئے لیکن سبزی کی قیمت میں سو فیصد اضافہ ہوچکا ہے۔ انہوں نے کہا کہ پھلوں کی قیمت میں گرانی نہیں آئی۔

ان کا کہنا ہے کہ پیر کو افواہوں کی وجہ سے ہائی وے اور اندرونِ سندھ کئی علاقوں میں دوبارہ کشیدگی پیدا ہوگئی ہے اور ٹرک چلنا بند ہوگئے ہیں۔ اگر یہی حالات رہے تو سامان کی ترسیل نہیں ہوسکے گی اور سبزیاں اور پھل کراچی نہیں پہنچ سکیں گے۔ انہوں نے مطالبہ کیا کہ حکومت فوری طور پر اس جانب توجہ دے اور امن و امان قائم کرے۔

اندرونِ سندھ امن عامہ کی صورتحال دگرگوں ہونے کے باعث مال بردار گاڑیوں کی آمدورفت ہائی وے پر مشکلات کا شکار ہے۔ کراچی گڈز کیرئیرز ایسوسی ایشن کے سربراہ یوسف ہارون خان نے کہا کہ ہائی وے پر سینکڑوں کی تعداد میں مال بردار گاڑیوں کو نذر آتش کر دیا گیا ہے۔ ان کا کہنا ہے کہ حکومت کے لیے امن و امان قائم کرنا کوئی مشکل کام نہیں ہے اگر حکومت چاہے تو فوری طور پر ایسا کرسکتی ہے لیکن ایسا لگتا ہے جیسے حکومت امن قائم کرنا نہیں چاہتی۔

دوسری جانب شہر میں ہنگامہ آرائی کے باعث تجارتی سرگرمیاں بھی بری طرح متاثر ہو رہی ہیں۔ کراچی چیمبر آف کامرس اینڈ انڈسٹریز کے صدر ہارون آگر نے بتایا کہ درجنوں فیکٹریوں کو نذر آتش کر دیا گیا ہے اور نقصان کا تخمینہ لگایا جارہا ہے جبکہ خراب حالات کی وجہ سے اربوں روپے کی برآمدات بھی رکی ہوئی ہیں۔

انہوں نے کہا کہ گزشتہ تین سے چار دنوں سے انڈسٹریز میں پیداوار بھی تعطل کا شکار ہے اور روزانہ اجرت پر کام کرنے والے مزدور بے روزگار ہوگئے ہیں۔

شرپسندوں نے شہر میں دکانیں ہوائی فائرنگ کرکے بند کرا دی ہیں، پبلک ٹرانسپورٹ نہ ہونے کے برابر ہے، تجارتی سرگرمیاں تعطل کا شکار ہیں، ہسپتالوں میں مریض پریشان ہیں اور شہر میں سراسمیگی چھائی ہوئی ہے، البتہ حکومتی اہلکاروں کا دعویٰ ہے کہ امان و امان کی صورتحال پر کافی حد تک قابو پا لیا گیا ہے۔