اعجاز مہر بی بی سی اردو ڈاٹ کام، اسلام آباد

	بے نظیر بھٹو پر بھی حکومت نے صدام حسین کو کمیشن دینے کا الزام عائد کیا تھا

پیر کے روز قومی اسمبلی میں کیے گئے پیپلز پارٹی کے اس مطالبے کی حکمران جماعت مسلم لیگ کے رکن ایم پی بھنڈارا نے تو حمایت کی لیکن کسی وزیر نے اس کا کوئی جواب نہیں دیا۔

پاکستان پیپلز پارٹی کے اراکین نے الزام لگایا کہ صدر مشرف کے اقتدار کے دوران تین کمپنیوں ’اے اینڈ اے سروسز، اور ’ بی سی انٹرنیشنل پرائیویٹ لمیٹڈ، اور آئل اینڈ گیس سروس گروپ نے ایک کروڑ اکیس لاکھ بیرل تیل اڑتالیس کروڑ اسی لاکھ ڈالر میں خریدا اور صدام حکومت کو بیالیس لاکھ چالیس ہزار ڈالر ’سرچارج، ادا کیا۔

انہوں نے ایوان میں حکومتی سرپرستی میں مبینہ بدعنوانی کے متعلق احتجاج کیا اور حکومت پر کڑی تنقید کی اور علامتی واک آؤٹ بھی کیا۔ ان کے واک آؤٹ میں مذہبی جماعتوں کے حزب مخالف کے اتحاد ’متحدہ مجلس عمل، نے حصہ نہیں لیا۔

پیپلز پارٹی کے رہنما راجہ پرویز اشرف، ناہید خان، شیری رحمٰن اور دیگر نے اس موقع پر کہا کہ حکومت بینظیر بھٹو کی کردار کشی کرتے ہوئے ان کا میڈیا ٹرائل کر رہی ہے۔ انہوں نے ’قومی احتساب بیورو، پر بھی نکتہ چینی کی اور کہا کہ یہ ادارہ صرف حکومت کے مخالفین کے خلاف استعمال کیا جارہا ہے۔

پیپلز پارٹی کے اراکین نے قبل ازیں کراچی میں واقع سٹیل ملز کی نجکاری کے خلاف تحریک التواء پیش کی جس پر سپیکر نے کہا کہ وہ بدھ کے روز اس پر کارروائی کریں گے۔

حزب مخالف کی اس جماعت نے الزام لگایا ہے کہ سٹیل ملز کے پچھہتر فیصد حصص اور آس پاس کی ساڑھے چار ہزار ایکڑ زمین ساڑھے اکیس کروڑ میں توارکی گروپ کو بیچ دیے ہیں۔ ان کے مطابق ’مارکیٹ ریٹ، کے مطابق چھ ارب روپے کم قیمت پر یہ سودا ہوا ہے جس سے قومی خزانے کو نقصان پہنچا ہے۔
قومی اسمبلی میں پیر کے روز حزب مخالف کی تمام جماعتوں کے نمائندوں نے مسلم لیگ نواز کے جیل میں بند رہنما جاوید ہاشمی اور خواجہ سعد رفیق اور بلوچستان نیشنل پارٹی کے رکن عبدالرؤف مینگل کو ایوان میں آنے سے روکنے کا معاملہ اٹھایا اور مذمت کی۔

چودھری نثار علی خان، راجہ پرویز اشرف اور لیاقت بلوچ نے کہا کہ سردار اختر مینگل کے گھر کا محاصرہ اب بھی جاری ہے اور وہاں ملاقات کے لیے جانے والے رکن اسمبلی رؤف مینگل کو سیکورٹی اہلکار ایوان کے اجلاس میں شرکت کے لیے آنے کی اجازت نہیں دے رہے۔

انہوں نے کہا کہ خواجہ سعد رفیق کو ایوان میں لانے کے لیے سپیکر نے ’پروڈکشن آرڈر، بھی جاری کیے ہیں لیکن حکومت نے عمل نہیں کیا۔ چودھری نثار علی نے کہا کہ موجودہ حکومت کے دور میں جتنی پارلیمیٹیرینز کی تضحیک ہوئی ہے اس کی ماضی میں مثال نہیں ملتی۔

حکومتی اتحاد میں شامل جماعت متحدہ قومی موومینٹ کے رکن کنور خالد یونس نے بھی اس موقع پر کہا کہ پارلیمینٹیرینز کے ساتھ برا سلوک نہیں ہونا چاہیے۔ انہوں نے رؤف مینگل کو اجلاس میں شرکت کے لیے آنے کی اجازت دینے کا مطالبہ بھی کیا۔

جس پر سپیکر نے وزیر قانون محمد وصی ظفر سے وضاحت طلب کی تو انہوں نے کہا کہ رؤف مینگل پر پابندی نہیں وہ خود نہیں آنا چاہتے۔ جبکہ ان کے مطابق خواجہ سعد رفیق کو ایوان میں لانے کے بارے میں پنجاب حکومت سے بات ہورہی ہے اور دو روز میں وہ جواب دیں گے۔

واضح رہے کہ خواجہ سعد رفیق کو پیغمبر اسلام کے خاکوں کی اشاعت کے دوران لاہور میں ہنگاموں کے سلسلے میں گرفتار کیا گیا ہے۔ اس بارے میں وہ ایوان میں قرآن پر ہاتھ رکھ کر کہہ چکے ہیں کہ وہ ان میں ملوث نہیں لیکن حکومت انہیں پھنسانا چاہتی ہے۔

قومی اسمبلی میں مذہبی جماعتوں کے اتحاد کے اراکین محمد حسین محنتی اور اسداللہ بھٹو نے کراچی میں سندھ آبادیوں کو مسمار کرنے کا معاملہ اٹھایا اور الزام لگایا کہ کراچی میں بسنے والے سندھیوں کے خلاف متحدہ قومی موومینٹ یعنی ایم کیو ایم والے کارروائیاں کر رہے ہیں۔ انہوں نے کہا اس کی وجہ یہ ہے کہ گوٹھوں میں رہنے والے سندھیوں نے ایم کیو ایم کو ووٹ نہیں دیا اس لیے اس کی انہیں سزا دی جارہی ہے۔