عبادالحق بی بی سی اردو ڈاٹ کام، لاہور

	مسلم لیگ نواز پیپلزپارٹی کی ذیلی تنظیم بن چکی ہے: پرویز الہی

پرویز الہی نے کہا کہ بے نظیر بھٹو اور نواز شریف کو دو دو مرتبہ اقتدار ملے لیکن انہوں نے عوام کے لیے کچھ نہیں کیا جس کی وجہ سے آج عوام ان دونوں سے مایوس ہوچکے ہیں۔

انہوں نے کہا کہ پیپلز پارٹی نے ہیمشہ غریبوں کے نام پر ووٹ مانگا لیکن افسوس کی بات ہے غریب کے لیے کچھ نہیں کیا گیا۔ چودھری پرویز الہی نے پیپلز پارٹی پر الزام لگایا کہ انیس سو اکتہر میں مشرقی پاکستانی کی علیحدگی کی ذمہ دار پیپلز پارٹی ہے جبکہ پیپلز پارٹی کے سربراہ بے نظیر بھٹو نے ملک میں کرپشن کی سیاست کو فروغ دیا ہے۔

انہوں نے مسلم لیگ نواز کو نکتہ چینی کا نشانہ بنایا اور کہا کہ مسلم لیگ نواز پیپلزپارٹی کی ذیلی تنظیم بن چکی ہے۔ چودھری پرویز الہی نے مسلم لیگ نواز کے کارکنوں سے اپیل کی کہ مسلم لیگ اور پیپلز پارٹی کے نظریات میں واضح فرق ہے اس لیے نواز لیگ کے کارکن حقیقی مسلم یعنی مسلم لیگ ق میں شامل ہوجائیں اور آٹھ جنوری کو سائیکل پر مہر لگا کر اس کو کامیاب کریں۔

چودھری پرویز الہی نےدعویٰ کیا کہ ان کی جماعت کی کارکردگی کی بنیادپر مسلم لیگ ق کے امیدواروں کو کامیابی حاصل ہوگی۔

انہوں نے کہا کہ آٹھ جنوری کو پیپلز پارٹی اور مسلم لیگ نواز کی کشتی ڈوب جائے گی۔

جلسہ سے کھاریاں سے ق لیگ کے قومی اسمبلی کے امیدوار نوا الحسن اور صوبائی اسمبلی کے امیدوار میاں طارق محمود نے بھی خطاب کیا۔ پرویز الہی پیر کو انتحابی کے سلسلہ میں جہلم میں جلسہ عام سے خطاب کریں گے۔