نثار کھوکھر بی بی سی اردو ڈاٹ کام، حیدرآباد

	عوام اور فوج کے درمیان تنازعہ نہیں عوام کےووٹ کا احترام چاہتی ہیں۔

بینظیر بھٹو پیر کےروز حیدرآباد کے اسری گراؤنڈ میں اپنے کارکنوں کےاجتماع سے خطاب کر رہی تھیں۔انہوں نے کسی ملکی ادارے یا فرد کا نام لیے بغیر کہا کہ جب انہوں ترقیاتی منصوبوں پر کام شروع کیا تو انہیں کہا گیا سیہون ڈیم اور کیٹی بندر نہ بنائیں۔ بینظیر نے کہا کہ وہ پوچھنا چاہتی ہیں کہ آخر فوجی چھاؤنیوں کے سوا کیا بنائیں؟

ان کا کہنا تھا کہ وہ عوام اور فوج کے درمیاں تنازعہ نہیں چاہتی۔عوام کےووٹ کا احترام چاہتی ہیں۔

بینظیر بھٹو نے اپنے خلاف دائر سوئس مقدموں کے حوالے سےکہا کہ حکمرانوں کو صرف میرے سوئس اکاؤنٹ یاد ہیں مگر انہیں سیہون ڈیم اور کیٹی بندر کاکوئی اکاؤنٹ یاد نہیں، عوامی ترقی کا کوئی اکاؤنٹ یاد نہیں۔

بینظیر بھٹو نے صوبہ سندھ میں اپنی انتخابی مہم کا آغاز حیدرآباد میں جلسے سےکر دیا ہے۔ انہوں نےجلسے کے بعد سندھ کےصوفی شاعر شاہ عبدالطیف بھٹائی کے مزار پر حاضری دی اور پھولوں کی چادر چڑھائی۔ بعد میں وہ پی پی رہنماء مخدوم امین فہیم کے آبائی گاؤں ہالا میں ان کی رہائش گاہ مخدوم ہاؤس گئیں۔

انہوں نے حیدرآباد میں سندھی ادیبوں اور دانشوروں سے ملاقات کا پروگرام عین وقت پر ملتوی کردیا۔

بینظیر بھٹو نے کارکنان سےاپیل کی کہ وہ آٹھ جنوری کے دن گھروں سے نکل کر پولنگ سٹیشن پر جائیں ۔بینظیر کا کہنا تھا کہ وہ شفاف انتخابات کے وعدے کا امتحان لینا چاہتی ہیں کیونکہ حکمرانوں کا ان سے یہ آخری وعدہ تھا۔

بینظیر بھٹو نےخبردار کیا کہ اگر آئندہ انتخابات شفاف نہ ہوئے تو پاکستان کو نقصان پہنچے گا اور ملکی حالات افغانستان جیسے بن جائیں گے اور عوام افغان مہاجرین جیسی زندگی بسر کرنے پرمجبور ہوگی۔

بینظیر بھٹو نے اپنی تقریر میں معزول ججوں کا کوئی ذکر نہیں کیا۔ پیپلز پارٹی کی سربراہ بینظیر بھٹو منگل کے روز میرپورخاص میں ایک جلسے سے خطاب کرنےجا رہی ہیں جس کےبعد وہ آصف زرداری کے آبائی ضلع نوابشاہ پہنچیں گی۔

پی پی پی رہنماؤں کےمطابق بینظیر بھٹو عید اپنے آبائی گاؤں نوڈیرو لاڑکانہ میں منائیں گی۔