عزیزاللہ خان بی بی سی اردو ڈاٹ کام، کوئٹہ

	جے یو آئی اور جماعت اسلامی میں اختلافات پیدا ہو چکے ہیں

جمعیت علمائے اسلام کی ریلی کے لیے صحافی میزان چوک اور منان چوک پر انتظار کرتے رہے لیکن نہ تو وہاں کوئی قائدین آئے اور ناں ہی کارکن آئے لیکن کچھ دیر بعد مولانا غفور حیدری کی قیادت میں ریلی کوئٹہ پریس کلب پہنچی جہاں احتجاجی مظاہرہ کیا گیا ہے۔

جماعت اسلامی کے مقامی قائدین اور کارکنوں نے چمن پھاٹک کے پاس احتجاجی مظاہرہ کیا ہے جس میں حکومت کے خلاف سخت نعرہ بازی کی گئی۔

اس کے علاوہ جمعیت علمائے اسلام نے چمن، پشینت نوشکی اور خضدار میں احتجاجی مظاہرے کیے ہیں۔ خضدار سے مقامی صحافیوں نے بتایا ہے کہ ریلی پر آنسو گیس کے گولے پھینکے گئے اور لاٹھی چارج کیا گیا ہے جس سے ایک مقامی لیڈر زحمی ہوئے ہیں اور چودہ کو گرفتار کیا گیا ہے۔

کوئٹہ میں آج آل پارٹیز ڈیموکریٹک موومنٹ میں شامل جماعتوں کے صوبائی قائدین کا اجلاس خفیہ مقام پر ہوا ہے جس میں انیس تاریخ کو احتجاجی مظاہرے کرنے کا اعلان کیا گیا ہے۔ اس اجلاس میں جمعیت علمائے اسلام فضل الرحمان گروپ کے قائدین نے شرکت نہیں کی۔

کوئٹہ میں احتجاجی ریلیوں کے دوران پولیس اور دیگر قانون نافذ کر نے والے اداروں کی جانب سے صحافیوں کو ہراساں کرنے کا سلسلہ بھی جاری ہے۔ دو روز پہلے اساتذہ کی احتجاجی ریلی کے دوران صحافیوں کوگرفتار کر کے رات کے وقت رہا کر دیا گیا تھا۔