عبدالحئی کاکڑ بی بی سی اردوڈاٹ کام، پشاور

	مولانا فضل الرحمان استعفوں کے علاوہ دوسرے طریقے اختیار کرنے پر بھی زور دے رہے ہیں

منگل کو پشاور میں متحدہ مجلس عمل کے فیصلہ ساز ادارے سپریم کونسل کے تقریباً تین گھنٹے سے زائد جاری رہنے والے اجلاس کے بعد اتحاد کے سیکریٹری جنرل اور حزب اختلاف کے رہنماء مولانا فضل الرحمن نے صحافیوں سے بات چیت کرتے ہوئے کہا کہ اجلاس نے اے پی ڈی ایم کی جانب سے استعفے دینے کے فیصلے کی اصولی طور پر توثیق کی ہے۔

انہوں نے زور دیکر کہا کہ استعفوں کے حوالے سے کسی قسم کا کوئی ابہام موجود نہیں ہے تاہم بقول ان کےجنرل پرویز مشرف کو دوبارہ صدر منتخب ہونے سے روکنے کے لیے استعفوں کے ساتھ ساتھ دیگر طریقوں کو بھی بروئے کار لایا جانا چاہیے۔

	مولانا قاضی حسین احمد کا استعفی دینے کے بارے میں رویہ بہت واضح ہے

اس موقع پرایم ایم اے کے ایک رہنما منور حسن نے بی بی سی سے بات چیت کرتے ہوئے کہا کہ مجلس عمل آل پارٹیز ڈیموکریٹک الائنس کے اجلاس میں یہ تجویز پیش کرے گی کہ پہلے قومی اسمبلی سے اور بعد میں صوبائی اسمبلی سے استعفے دیئے جانے چاہئیں جبکہ تیسرے مرحلے میں صوبہ سرحد کی اسمبلی کو تحلیل کیا جانا چاہیے۔

ان کے بقول’ ہم اے پی ڈی ایم کے گزشتہ اجلاس کے فیصلوں پر اب بھی قائم ہیں تاہم آئندہ اجلاس میں ایم ایم اے یہ تجاویز پیش کرے گی کہ مرحلہ وار استعفے دیئے جائیں تاکہ اس دوران صدر جنرل پرویز مشرف پر آئینی، قانونی، سیاسی اور اخلاقی دباؤ بڑھایا جاسکے۔

اس سے قبل یہ طے پایا تھا کہ اجلاس کے اختتام پرصحافیوں کو ایک بریفنگ دی جائے گی مگر اس سے اچانک منسوخ کردیا گیا۔ اجلاس کے بعد جماعتی قواعد و ضوابط کے برعکس ایم ایم اے کے سربراہ قاضی حسین احمد کی بجائے سیکریٹری جنرل مولانا فضل الرحمن نے صحافیوں سے انتہائی مختصر بات چیت کی اور جب صحافیوں نے قاضی حسین احمد سے بات چیت کرنا چاہی تو انہوں نے کچھ کہنے سے انکا ر کردیا۔

سیاسی مبصرین بقول ایم ایم اے میں شامل جمیعت علماء اسلام کے قائدین اب بھی استعفی کے معاملے پر تذبذب کا شکار ہیں اور ان کی کوشش ہے جنرل پرویز مشرف کو دوبارہ صدر منتخب ہونے سے روکنے کے لیے استعفوں کی بجائے کوئی اور راستہ ڈھونڈا جائے۔