عباد الحق بی بی سی اردو ڈاٹ کام، لاہور

	حملے میں استعمال ہونے والے دھماکہ خیز مواد کا وزن دس کلو سے زیادہ تھا

جمعرات کی صبح ہونے والے اس خودکش حملے میں حملہ آور کے علاوہ آٹھ اہلکار ہلاک اور ستائیس زخمی ہوئے ہیں۔ زخمیوں کو پی اے ایف ہسپتال میں داخل کرایا گیا ہے جن میں سے پانچ کی حالت تشویش ناک بتائی جاتی ہے۔

سرگودھا میں خود کش حملہ، نو ہلاک

فضائیہ کی بس پر خودکش حملہ

سرگودھا پولیس کے سربراہ حامد مختار گوندل نے بی بی سی کو بتایا ہے کہ پولیس کو خودکش حملہ آور کا سر اور ہتھیلی موقع واردات سے ملی ہے جسے ڈی این اے ٹیسٹ کے لیے بجھوایا جا رہا ہے۔

ان کا کہنا تھا کہ اس واقعہ کی چھان بین کے لیے ڈسٹرکٹ پولیس آفیسر وسیم خان کی سربراہی میں ایک تفتیشی ٹیم تشکیل دے دی گئی ہے اور جلد ہی ملزمان کا پتہ چل جائےگا۔ حامدگوندل کے بقول خودکش حملے میں استعمال ہونے والا دھماکہ خیز مواد کا وزن دس کلو سے زیادہ تھا۔

سرگودھا پولیس کے سربراہ کے مطابق موٹر سائیکل پر سوار حملہ آور بس کی بائیں جانب سے ٹکرایا جس کی وجہ سے بس کی بائیں جانب سوار اہلکار ہی ہلاک ہوئے۔

ان کا کہنا تھا کہ پولیس کو اس واقعہ کی کوئی پیشگی اطلاع نہیں تھی تاہم اس واقعہ کے بعد سرگودھا کو ریڈ الرٹ کر دیا گیا ہے اور پولیس کے ساتھ ایلیٹ فورس کے اہلکاروں کو بھی تعینات کیا گیا ہے۔

ادھر خودکش حملے میں ہلاک ہونے والے فضائیہ کے اہلکاروں کی نماز جنازہ جمعرات کی شام ادا کر دی گئی ہے۔

واضح رہے کہ یہ خود کش حملہ جمعرات کی صبح ساڑھے سات بجےسرگودھا فیصل آباد روڈ پر پاکستان ائر فورس بیس سے تقریباً دو کلومیٹر دور اس وقت ہوا تھا جب ائرفورس کے اہلکار کرانہ پہاڑی پر واقع ریڈار پر ڈیوٹی کے بعد واپس لوٹ رہے تھے۔

سرگودھا میں پاکستان کا سب سے بڑا فضائی اڈہ ہے جبکہ سرگودھا میں ہیں اسی سال اگست کے اوائل میں پولیس ٹریننگ سینٹر میں ایک خود کش حملہ کی کوشش کو ناکام بنایا گیا تھا جس کے دوران خود کش حملہ آور اورایک پولیس اہلکار ہلاک ہوئے تھے۔