ہارون رشید بی بی سی اردو ڈاٹ کام، اسلام آباد

	سنتے ہیں کہ یہ افغانستان کا اثر ہے: میاں گل اورنگزیب

’یہ حالات خراب کیے ہیں مرکزی حکومت نے۔ میں تو برائے نام والیِ سوات ہوں۔‘

اسلام آباد میں افغان سفارت خانے کی بغل میں واقع اپنی رہائش گاہ کے لان میں ان سے ملاقات کا موقع ملا تو ایسا محسوس ہوا جیسے ان سے بات چیت سوات میں ہی ہو رہی ہو۔

ان کے بیان سے ثابت ہوتا ہے کہ اس میں ان کی متحرک زندگی کے سیاسی نچوڑ کے ساتھ ساتھ احتیاط کا عنصر شامل ہوتا ہے۔ ان کی قوت سماعت میں عمر کی وجہ سے کمی ضرور آئی ہے لیکن سیاسی بصیرت میں نہیں۔

میاں گل اورنگزیب کا کہنا ہے کہ سوات میں جو بھی ہو رہا ہے جان بوجھ کر کیا جا رہا ہے۔ ’یہاں لال مسجد کا قصہ بتاؤں میں آپ کو۔ لال مسجد کا معاملہ ایک تھانیدار بھی حل کر سکتا تھا لیکن اسے نہیں حل کیا گیا۔ ایک سال تک تاخیر کے بعد معلوم نہیں کتنے سو لوگوں کو مار دیا۔ ان کے لیے جان لینے کی ان کو کوئی پروا نہیں ہے۔‘

مسلم لیگ (ن) کے رہنما اور سرحد اور بلوچستان کے گورنر رہنے والے میاں گل اورنگزیب سے دریافت کیا کہ حکومت کیونکر حالات خراب کرے گی تو ان کا جواب وہی تھا جو پاکستان کی اکثر عوام سمجھتی ہے۔’جتنے زیادہ حالات خراب ہوں گے اتنا زیادہ بُش ڈرے گا۔ یہ ان کو بتاتے ہیں کہ اگر ہمیں ہٹاتے ہو تو یہ اور بڑھے گا۔‘

	مذہبی عناصر اور شدت پسندی شروع سے موجود تھی

پوچھا کہ بات صرف القاعدہ تک کی ہے تو ان کا مسکراتے ہوئے جواب تھا کہ جب حالات خراب ہوتے ہیں تو سب بدمعاشی شروع کر دیتے ہیں۔ ’کہتے ہیں کہ مولانا فضل اللہ متوازی حکومت چلا رہا ہے۔ کوئی ایسی حکومت وہ نہیں چلا رہا۔ جب تم اپنی حکومت نہیں چلا سکتے تو کوئی تو چلائے گا۔ دوسرا یہ کہتے ہیں کہ وہ (پولیو کی) دوا کے خلاف ہے۔ ادویات کی کمپنیاں بھی کئی برسوں تک اپنا دوائیں مارکٹ کرنے کے بعد بند کردیتی ہیں کہ ان کے زہریلے اثرات مرتب ہوتے ہیں۔ تو ہوسکتا ہے کل کو پولیو کے بارے میں بھی یہ خبر آ جائے۔‘

پرامن تصور کیے جانے والے سوات میں یکایک شدت پسندی میں اضافے کے بارے میں سابق رکن قومی اسمبلی کا کہنا تھا کہ مذہبی عناصر اور شدت پسندی شروع سے موجود تھی۔ ’سرتور (سیاہ سر والا) فقیر نامی شخص نے برطانوی فوج کے خلاف ملاکنڈ کے مقام پر بیس ہزار مسلح افراد اکٹھے کرکے مزاحمت کی تھی تاہم وہ ہار گیا تھا۔‘

	یہ حالات دوبارہ خراب موجودہ حکمرانوں کی نالائقی سے ہوئے ہیں

جب پوچھا کہ کیا اضافی فوجی مسئلے کا حل ہیں تو ان کہنا تھا کہ اب یہ فوج وہاں گئی ہے اور کافی مہینے ہوگئے ہیں۔ ’میں نے لوگوں سے پوچھا کہ فوج وہاں کیا کر رہی ہے تو اُنہوں نے بتایا کہ بس پہاڑوں میں بیٹھی ہے۔‘

اگر ان کا الزام درست ہے تو حکومت نے حالات خراب کرنے کے لیے سوات کو ہی کیوں چنا، میاں گل اورنگزیب کا کہنا تھا کہ وہ تمام ملک میں تو اسے شروع نہیں کرسکتے تھے۔ ’پہلے وزیرستان، پھر باجوڑ اور اب سوات۔‘

ان کا موقف تھا کہ حکومت کو جلد اقدام اُٹھانا چاہیے۔ ’جب بھی آپ کسی مسئلے کے خلاف ابتداء میں اقدام نہیں کرتے تو وہ بڑھ جاتا ہے۔‘

دلکش وادی سوات میں سیاحت ایک بڑا ذریعے روزگار رہا ہے لیکن اب نہیں۔ انہوں نے اس بات پر خصوصی طور پر افسوس کیا کہ یہ سب کچھ ایسے وقت ہو رہا ہے جب حکومت نے اس سال کو سیاحت کا برس قرار دیا تھا۔ ’جو کسی جاہل ملک کو دیکھنا چاہیں گے وہ یہاں آئیں گے۔‘

خراب فیکٹری اگر کوئی فیکٹری مجھ سے آپ لے لیں اور تباہ برباد کرنے کے بعد لوٹا دیں تو میں کیا کرسکتا ہوں؟

سیاست سے تقریبا ریٹائر زندگی گزارنے والے میاں گل اورنگزیب کا کہنا تھا کہ وہ حالات کی بہتری میں اب کوئی کردار ادا نہیں کرسکتے۔ ’اگر وہ مجھے کسی کمیٹی کے لیے بھی نامزد کریں گے تو میں نہیں جاؤں گا۔ حالات مزید خراب ہوں گے۔‘

’اگر مجھے ریاست سوات واپس بھی کر دی جائے تو میں اسے درست نہیں کرسکتا۔ اگر کوئی فیکٹری مجھ سے آپ لے لیں اور تباہ برباد کرنے کے بعد لوٹا دیں تو میں کیا کرسکتا ہوں؟‘