عبدالحئی کاکڑ بی بی سی اردو ڈاٹ کام، مینگورہ، سوات

مولانا فضل اللہ کے نائب مسلم خان ذرائع ابلاغ کے نمائندوں سے بات کر رہے ہیں

حکام کا کہنا ہے کہ ضلع سوات میں جمعہ کوسکیورٹی فورسز اور مولانا فضل اللہ کے مسلح حامیوں کے درمیان ہونے والی لڑائی کے دوران آٹھ اہلکاروں کا گلا کاٹ کر ہلاک کردیا گیا ہے۔

صدر مقام مینگورہ میں حکام کا کہنا ہے کہ ان اہلکاروں کو مولانا فضل اللہ کا مضبوط گڑھ سمجھے جانے والے علاقے مٹہ اور شکردرہ میں گلا کاٹ کر ہلاک کردیا گیا ہے۔ مولانا فضل اللہ کے ایک ذمہ دار معاون نے بھی اس واقعے کی تصدیق کی ہے۔ہلاک ہونے والوں میں ایک انسپکٹر اور سات سپاہی شامل ہیں۔

سوات تشدد کا فرنٹ لائن کیسے بنا؟

سوات میں دھماکہ: تصویروں میں

عینی شاہدین نے کیا دیکھا

سوات میں تشدد کا نیا سلسلہ

جمعہ کو سکیورٹی فورسز اور مولانا فضل اللہ کے مسلح حامیوں کے مابین چھ گھنٹے تک جاری رہنے والی لڑائی کے غیر اعلانیہ طور پر رکنے کے باوجود سنیچر کو بھی فریقین کے درمیان تاحال مذاکراتی عمل شروع نہیں ہوسکا ہے۔

امام ڈھیرئی مرکز کے نائب امیر مسلم عبدالرشید نے بی بی سی سے بات چیت کرتے ہوئے حکومت کے ساتھ بات چیت کرنے پر آمادگی ظاہر کی ہے۔

انہوں نے مزید بتایا کہ سنیچر کی صبح ایک اعلیٰ فوجی افسر نے ان کے ساتھ رابطہ کرکے مذاکرات کی خواہش ظاہر کی تھی تاہم ان کے بقول یہ ایک غیر رسمی رابطہ تھا جس میں کوئی پیشرفت نہیں ہوسکی ہے۔ ان کے بقول’ ہم نہ صرف سوات میں بلکہ پورے پاکستان میں شریعت کا نفاذ چاہتے ہیں جس کے لیے مسلح جدوجہد سے بھی دریغ نہیں کیا جائے گا‘۔

امام ڈھیرئی پر کنٹرول  امام ڈھیرئی اور ملحقہ علاقہ اس وقت مکمل طور پر مولانا فضل اللہ کے مسلح حامیوں کے کنٹرول میں ہے جو علاقے میں داخل ہونے والی گاڑیوں کی تلاشی لے رہے ہیں

امام ڈھیرئی اور ملحقہ علاقہ اس وقت مکمل طور پر مولانا فضل اللہ کے مسلح حامیوں کے کنٹرول میں ہے جو علاقے میں داخل ہونے والی گاڑیوں کی تلاشی لے رہے ہیں۔

دوسری طرف سکیورٹی فورسز کے اہلکار ایئر پورٹ اور آس پاس کے پہاڑوں پر واقع چیک پوسٹوں میں چوکس دکھائی دیئے تاہم وہ عوامی مقامات اور سڑکوں پر بہت ہی کم نظر آئے۔

سنیچر کی دوپہر کو حکومت کی جانب سے ہیلی کاپٹروں کے ذریعے مولانا فضل اللہ کے زیر کنٹرول علاقے پر پشتو اور اردو زبانوں میں پمفلٹ گرائے گئے جس میں لوگوں سے کہا گیا ہے کہ وہ سوات میں قیام امن کے لیے مبینہ شرپسندوں کے خلاف حکومتی کارروائی میں حکومت کا ساتھ دیں۔

پمفلٹ میں مزید کہا گیا ہے کہ’ عوام حکومت کا ساتھ دیں تاکہ سوات کو مبینہ دہشت گردوں سے پاک کیا جاسکے اور حالیہ حکومتی کاروائی کا مقصد لوگوں کے جان و مال کا تحفظ کرنا ہے‘۔ پمفلٹ کے مطابق سوات میں قاضی عدالتوں کا قیام اور’ شریعت کا نفاذ‘ حکومت کی اولین ترجیحات میں شامل ہیں۔

عوام حکومت کا ساتھ دیں تاکہ سوات کو مبینہ دہشت گردوں سے پاک کیا جاسکے اور حالیہ حکومتی کاروائی کا مقصد لوگوں کے جان و مال کا تحفظ کرنا ہے حکومت کا پمفلٹ

گزشتہ روز سے جاری کشیدگی کے سلسلے میں حکومتی مؤقف جاننے کے لیےضلع سوات کے اعلی اہلکاروں سے گزشتہ چوبیس گھنٹوں کے دوران بارہا رابطے کی کوشش کی گئی اور انکے دفاتر اور رہائش گاہوں کا دورہ کرنے کے باوجود انہیں وہاں نہیں پایا۔ ضلعی رابطہ افسر کے دفتر میں مینگورہ کے مختلف علاقوں کے عوامی نمائندوں نے بی بی سی سے بات چیت کرتے ہوئے یہ الزام لگایا کہ گزشتہ چند ماہ سے مقامی انتظامیہ تقریباً مفلوج ہوکر رہ گئی ہے۔

یونین کونسل کبل کے ناظم محمد حسین ایڈوکیٹ نے بتایا: ’سوات میں گزشتہ کچھ عرصے سے تحصیل اور ضلع ناظمین کے دفاتر بند پڑے ہیں اور تمام معاملات سوات کی بجائے پشاور سے حل کیے جارہے ہیں‘۔

دوسری طرف باجوڑ میں مقامی طالبان کے کمانڈر مولانا فقیر محمد نے سوات کی حالیہ صورتحال پر اپنے ردعمل کا اظہار کرتے ہوئے بی بی سی کو بتایا کہ مولانا فضل اللہ کے خلاف مبینہ حکومتی کارروائی ختم نہ ہونے تک باجوڑ میں امن و امان قائم کرنے کے لیے مصالحتی جرگے سے بات چیت نہیں ہوگی۔

انہوں نے مزید کہا کہ جنوبی و شمالی وزیرستان، باجوڑ، مہمند ایجنسی اور سوات میں سرگرم مبینہ طالبان کا ایک دوسرے کے ساتھ باقاعدہ رابطہ ہے اور وہ ضرورت پڑنے پر مولانا فضل اللہ کے شانہ بشانہ لڑنے کے لیے سوات پہنچ سکتے ہیں۔