نثار کھوکھر بی بی سی اردو ڈاٹ کام، گڑھی خدا بخش

بینظیر نے استقبالیہ جلوس پر بم حملوں کے بعد دورۂ سندھ مؤخر کر دیا تھا

بینظیر بھٹو نے اس امید کا اظہار کیا کہ سپریم کورٹ مفاہمتی آرڈینس کو رد نہیں کرے گی۔انہوں نے کہا کہ ان کے پاس کوئی ایسی اطلاع نہیں ہے کہ سپریم کورٹ مفاہمتی آرڈینس کو رد کر دے گی۔

آٹھ سال کی خود ساختہ جلاوطنی کے بعد پہلی بار بار نوڈیرو پہنچنے پر بینظیر بھٹو نے اپنی رہائش گاہ پر مختصر پریس کانفرنس سے خطاب کرتے ہوئے کہا کہ ان کی جماعت اور حکومت کےدرمیان اٹھاون ٹو بی کی شق پر کوئی اتفاق نہیں ہوسکا ہے ۔

بینظیر بھٹو کا مزید کہنا تھا کہ انہوں نے اپنی جماعت کے رہنماؤں کو تیسری مرتبہ وزیراعظم بننے کے بارے میں اعتماد میں لے لیا ہے۔

بینظیر بھٹو نے ناظمین کے اختیارات میں کمی کے اپنے مطالبے کو ایک بار پھر دہرایا۔ انہوں نے کہا کہ انتخابات کو منصفانہ اور شفاف بنانے کے لیے ناظمین کے اختیارات میں کمی ضروری ہے۔انہوں نے کہا کہ وہ عوام سے ملتی رہیں گی انہوں نےصرف اپنی حکمت عملی تبدیل کی ہے ۔

بینظیر بھٹو اندرونِ سندھ کے دورے کے دوران گڑھی خدا بخش میں اپنے والد کے مزار پر حاضری دینے کے بعد جب بلٹ پروف گاڑی میں نوڈیرو پہنچیں تو پارٹی کارکنوں نے ان کا پرتپاک استقبال کیا۔

بینظیر آٹھ برس کے وقفے کے بعدگڑھی خدا بخش میں اپنے آبائی قبرستان آئیں جہاں انہوں نے اپنے والد اور بھائیوں کی قبروں پر پھول چڑھائے اور فاتحہ و قرآن خوانی کی۔

بینظیر کا دورۂ نوڈیرو:تصاویر

لاڑکانہ: وزیراعظم جیسی سکیورٹی

قبر پر حاضری کے بعد بی بی سی سے بات کرتے ہوئے بینظیر بھٹو کا کہنا تھا کہ’میں یہاں پہنچ کر جذباتی محسوس کر رہی ہوں۔ میں یہاں کئی برس بعد آئی ہوں اور پاکستان میں ہوتی تھی تو ہر برس عید پر آنا ہوتا تھا‘۔

	سکھر ایئرپورٹ سے لاڑکانہ جاتے وقت بینظیر کا استقبال

ایک سوال کے جواب میں بینظیر نے کہا کہ ’چودھریوں کا اقتدار ختم ہونے والا ہے ان کی بات چھوڑ دیں‘۔ انہوں نے کہا کہ حکومت کو خود کش حملے روکنے کے لیے سنجیدہ اقدامات کرنے کی ضرورت ہے کیونکہ ملک میں انتخابات ہونے والے ہیں اور سکیورٹی کی ضرورت صرف پیپلز پارٹی کے رہنماؤں کو ہی نہیں بلکہ ملک کے تمام سیاسی رہنماؤں کو ہے۔

اس سے قبل بینظیر بلٹ پروف گاڑی میں سوار سکھر سے گڑھی خدا بخش پہنچیں تو پیپلزپارٹی کے چار ہزار کے قریب کارکنوں نے جئے بھٹو کے نعروں سے ان کا خیر مقدم کیا۔ تاہم بینظیر نے موقع پر موجود کارکنوں سے خطاب نہیں کیا۔بینظیر کے ہمراہ اس موقع پر ناہید خان، قائم علی شاہ اور نثار کھوڑو بھی موجود تھے۔

گڑھی خدا بخش بھٹو میں بینظیر کے آمد کے موقع پر ’جانثاران بینظیر‘ بڑی تعداد میں موجود تھے جنہوں نے سکیورٹی کے انتظامات سنبھالے ہوئے تھے۔ پاکستان پیپلز پارٹی کے مقامی رہنماؤں کے مطابق سکیورٹی کے خدشات کی وجہ سےگڑھی خدا بخش بھٹو میں کوئی استقبالیہ منعقد نہیں کیا جا رہا جبکہ وہاں سے بینظیر نوڈیرو ہاؤس جائیں گی جہاں ایک استقبالیہ کا انتظام کیا گیا ہے۔

بینظیر دورے کے پہلے مرحلے میں سنیچر کی صبح کراچی سے بذریعہ ہوائی جہاز سکھر ہوائی اڈے پر پہنچی تھیں جہاں پارٹی کارکنان نے بڑی تعداد میں ان کا خیرمقدم کیا اور ان کے حق میں نعرے بازی کی۔

بینظیر بھٹو کے دور اقتدار بھی شہر میں اتنی سخت سکیورٹی نہیں دیکھی۔ ذوالفقار علی بھٹو کا دور بھی دیکھا ہے مگر شہر میں سکیننگ مشینییں اور بلٹ پروف گاڑیاں پہلی مرتبہ دیکھ رہے ہیں ۔ جمال داؤد پوٹو، نوڈیرو

ادھر نوڈیرو میں بینظیر کے آمد کے موقع پر سکیورٹی اتنی سخت کر دی گئی ہے کہ بنگلے کے پرانے ملازمین کو بھی اندر جانے کی اجازت نہیں دی جا رہی ہے اور سکیورٹی انتظامات آصف زرداری کی جانب سے تعینات کردہ محافظوں کے ذمہ ہیں۔

نوڈیرو کے مقامی لوگوں کا کہنا ہے کہ بھٹو کے بنگلے پر اتنی سخت سکیورٹی انہوں نے پہلی مرتبہ دیکھی ہے ۔’پیپلز ہاری کمیٹی نوڈیرو‘ کے سابق رہنماء جمال داؤد پوٹو کا کہنا تھا کہ انہوں بینظیر بھٹو کے دوران اقتدار بھی شہر میں اتنی سخت سکیورٹی نہیں دیکھی۔ان کا کہنا تھا کہ انہوں نے ذوالفقار علی بھٹو کا دور بھی دیکھا ہے مگر شہر میں سکیننگ مشینییں اور بلٹ پروف گاڑیاں پہلی مرتبہ دیکھ رہے ہیں ۔

بین الاقومی خبر رساں اداروں کے مطابق بینظیر سنیچر کی صبح انتہائی سخت سکیورٹی میں کلفٹن میں اپنی رہائش گاہ سے کراچی کے ہوائی اڈے کے لیے روانہ ہوئیں۔ ان کی گاڑیوں کا قافلہ جو انتہائی تیز رفتاری سے ہوائی اڈے کی طرف روانہ ہوا اس میں ایک درجن سے زیادہ پولیس کی گاڑیاں بھی شامل تھیں۔اس موقع پر ان کے راستے پر رینجرز اور پولیس کی بھارتی نفری تعینات تھی اور ایئر پورٹ جانے والے راستوں پر ناکہ بندی بھی کی گئی تھی۔