احمدرضا بی بی سی اردو ڈاٹ کام، کراچی

	بلٹ پروف گاڑی کی قیمت عام لگژری کار سے کئی گنا زیادہ ہوتی ہے

بے نظیر بھٹو نے اپنے وکیل فاروق ایچ نائیک کے توسط سے سندھ ہائی کورٹ میں ایک درخواست داخل کی تھی جس میں انہوں نے عدالت سے استدعا کی تھی کہ وہ حکومت کو انہیں بلٹ پروف گاڑی منگوانے کی اجازت دینے کا حکم دے۔

ان کا کہنا تھا کہ وہ اپنی جماعت کی انتخابی مہم چلانے کے لئے آئندہ ماہ پاکستان آنا چاہتی ہیں جہاں انہیں اور ان کے خاندان کے افراد کو ’بہت سے حلقوں خصوصاًً انتہا پسند عناصر سے سخت خطرہ ہے۔‘

جمعہ کو سندھ ہائی کورٹ کے چیف جسٹس صبیح الدین احمد اور جسٹس فیصل عرب پر مشتمل دو رکنی بینچ نے اس درخواست کی سماعت کی۔ اس موقع پر ڈپٹی اٹارنی جنرل رضوان احمد نے عدالت کو بتایا کہ وزارت داخلہ حکومت پاکستان نے بے نظیر بھٹو اور ان کی نندوں، ضلعی ناظمہ نوابشاہ فریال تالپور اور رکن قومی اسمبلی عذرا پیچوہو، کو بلٹ پروف گاڑیاں درآمد کرنے کی اجازت دیدی ہے۔

بے نظیر بھٹو کی درخواست کے مطابق ماہ اگست میں ان کی نند رکن قومی اسمبلی عذرا پیچوہو نے صوبائی اور وفاقی سیکرٹری داخلہ کو درخواست دی تھی جس میں ان کے اور ان کے خاندان کے لئے بلٹ پروف گاڑی درآمد کرنے کی اجازت دینے کی درخواست کی گئی تھی

بے نظیر بھٹو کی درخواست کے مطابق ماہ اگست میں ان کی نند رکن قومی اسمبلی عذرا پیچوہو نے صوبائی اور وفاقی سیکرٹری داخلہ کو درخواست دی تھی جس میں ان کے اور ان کے خاندان کے لئے بلٹ پروف گاڑی درآمد کرنے کی اجازت دینے کی درخواست کی گئی تھی لیکن اس کا کوئی جواب نہیں دیا گیا جس پر انہوں نے عدالت سے رجوع کیا تھا۔

واضح رہے کہ بے نظیر بھٹو نے اٹھارہ اکتوبر کو وطن واپس آنے کا اعلان کر رکھا ہے اور ان کی پارٹی کے مقامی قائدین کا کہنا ہے کہ وہ کراچی ائرپورٹ پہنچیں گی جہاں ان کا فقید المثال استقبال کیا جائےگا۔