آصف فاروقی بی بی سی اردو ڈاٹ کام، اسلام آباد

	یہ انتظامات دہشت گردی کے خدشے کے پیش نظر کیئے جا رہے ہیں

اسلام آباد میں ہفتہ وار بریفنگ میں انہوں نے صحافیوں کو بتایا کہ خفیہ اداروں کے پاس اس طرح کی اطلاعات آئی ہیں کہ جن کی بنیاد پر اسلام آباد میں دہشت گردی کے منصوبوں کے شک کو تقویت ملتی ہے۔

انہوں نے کہا کہ ان اطلاعات کی بنیاد پر اسلام آباد میں صدارتی انتخاب سے متلعق اہم دنوں کے لئے حفاظتی منصوبہ بندی کرنے کے علاوہ صوبائی حکومتوں اور دیگر اداروں کو بھی یہ اطلاع پہنچا دی گئی ہے۔

برگیڈئیر چیمہ نے کہا کہ گزشتہ دو روز کے دوران سیاسی کارکنوں اور رہنماؤں کی گرفتاری بھی انہی حفاظتی اقدامات کے زمرے میں آتی ہے۔

انہوں نے کہا کہ الیکشن کمیشن اور عدالت عظمیٰ سمیت اہم اداروں کے گھیراؤ اور ان پر قبضے کے اعلان کے بعد حکومت کے پاس ان لوگوں کو گرفتار کرنے کے علاوہ کوئی چارہ نہیں تھا۔

انہوں نے کہا کہ مہذب معاشروں میں کوئی بھی حکومت کسی کو قانون اپنے ہاتھ میں لینے کی اجازت نہیں دے سکتی۔

وزارت داخلہ کے ترجمان نے کہا کہ قبائلی علاقوں میں مغوی نیم فوجی اہلکاروں کی رہائی کے سلسلے میں خاصی پیش رفت ہوئی ہے اور گزشتہ دنوں 26 مغویوں کی رہائی اس کی علامت ہے۔ انہوں نے کہا کہ حکومت کے لئے اغوا کاروں کے مطالبے ناقابل قبول ہیں اور حکومت ’دہشت گردوں‘ سے مذاکرات نہ کرنے کی پالیسی پر کاربند ہے۔

برگیڈئیر چیمہ نے صحافیوں کو بتایا کہ برطانیہ کے ساتھ دونوں ملکوں میں دہشت گردی، انتہا پسندی اور شدت پسندی کے رجحانات کے خاتمے کے لئے مشترکہ کوششوں کے لئے ہونے والے مذاکرات کا دوسرا دور بہت جلد برطانیہ میں منعقد ہو گا۔

القاعدہ کے سربراہ اسامہ بن لادن کی جانب سے جنرل پرویز مشرف اور پاک فوج کے خلاف اعلان جنگ کے حوالے سے پوچھے گئے ایک سوال کے جواب میں ترجمان نے کہا کہ حکومت کسی کی دھمکیوں سے مرعوب ہوئے بغیر دہشت گردی کے خلاف اپنی کاروائیاں جاری رکھے گی۔