عبدالحئی کاکڑ بی بی سی اردو ڈاٹ کام، پشاور

	تقریباً ستّر پولیس اہلکاروں نے پکڑ کرگاڑی میں ڈال دیا: ایڈووکیٹ خورشید

پشاور کے سینیئر سپرنٹنڈنٹ پولیس طاہر خان نے بی بی سی کو بتایا کہ خورشید ایڈوکیٹ کو پیر کی شب تقریباً بارہ بجے پشاور میں اپنی رہائش گاہ سےگرفتار کیا گیا تھا تاہم انہوں نے اس سلسلے میں مزید تفصیلات دینے سے انکار کردیا۔

خورشید خان ایڈوکیٹ کے وکلاء اشتیاق ایڈوکیٹ اور پیر فدا ایڈوکیٹ نےمنگل کو پشاور کے ڈسٹرکٹ سیشن کورٹ کےجج مفتاح الدین کی عدالت میں ضمانت کی درخواست دائر کردی جسے قبول کرتے ہوئے عدالت نے ان کی رہائی کے احکامات جاری کردیئے۔عدالت نے انہیں سات دنوں کے اندر اسلام آباد میں متعلقہ عدالت کے سامنے پیش ہونے کا حکام صادر کردیا۔

وکلاء نے پشاور ہائی کورٹ میں ان کا پرتپاک استقبال کیا۔ رہائی پانے کے بعد خورشید خان ایڈوکیٹ نے بی بی سی سے بات چیت کرتے ہوئے دعویٰ کیا کہ پیر کی شب تقریباً بارہ بجے وہ ایک نجی ٹی وی چینل کو انٹرویو دے رہے تھے کہ ان کے گھر کے دروازے پردستک ہوئی۔ان کے بقول باہر آنے پر انہوں نے صوبہ سرحد اور اسلام آباد پولیس کے تقریباً ستّر پولیس اہلکاروں کو موجود پایاجنہوں نے انہیں اسی وقت پکڑ کرگاڑی میں ڈال دیا۔

ان کے مطابق انہیں بارہ گھنٹے کی حراست کے دوران میں تقریباً چار مقامات پر رکھا گیا اورا ن کے چہرے پر کالی چادر ڈال دی گئی تھی۔خورشید ایڈوکیٹ نے یہ دعویٰ بھی کیا کہ انہیں پانی کے علاوہ کھانے کے لیےکچھ نہیں دیا گیا۔

	احمد رضا قصوری نےتعزیرات پاکستان کی دفعہ 337 ایل کے تحت مقدمہ درج کرایا ہے

اس سے قبل منگل کی صبح ان کی گرفتاری کیخلاف پشاور کی وکلاء نے احتجاج کرتے ہوئے ہائی کورٹ کی عمارت کے سامنے گزرنے والی سڑک کو ہرقسم کے ٹریفک کے لیے بند کردیا۔اس موقع پر درجنوں وکلاء نےصدر جنر ل پرویز مشرف کے خلاف سخت نعرہ بازی کی۔

واضح رہے کہ پیپلز پارٹی پشاور سے تعلق رکھنے والے سینیئر وکیل خورشید خان ایڈوکیٹ نے پیر کی صبح سپریم کورٹ میں صدر کے دو عہدوں کے خلاف آئینی پٹیشن کی سماعت کے آغاز سے قبل ’احتجاج‘ کرتے ہوئےسرکاری وکیل احمد رضا قصوری کے چہرے پر سیاہ رنگ سپرے کر دیا تھا۔ بعد میں اسلام آباد میں سیکرٹریٹ پولیس نے حکومتی وکیل احمد رضا قصوری کی درخواست پر ان کے کے خلاف تعزیرات پاکستان کی دفعہ 337 ایل کے تحت مقدمہ درج کرلیا۔
سیکرٹریٹ سرکل کے ڈی ایس پی گلفام ناصر وڑائچ نے بی بی سی کو بتایا کہ یہ مقدمہ صرف ایک شخص خورشید خان کے خلاف دوج کیا گیا ہے جبکہ درخواست گزار نے اپنی درخواست میں سینیئر وکلاء اعتزاز احسن، منیر اے ملک اور علی احمد کرد پر الزام لگایا تھا کہ ملزم نے یہ اقدام ان کی ایماء پر کیا ہے۔

بی بی سی اردو ڈاٹ کام سے بات کرتے ہوئے خورشید ایڈووکیٹ نے کہا تھا کہ اتوار کی شب ایک نجی ٹی وی چینل پر احمد رضا قصوری کی باتوں سے ان کا صبر کا پیمانہ لبریز ہوا جس کے بعد انہوں نے یہ قدم اٹھانے کا فیصلہ کیا۔