بیورو رپورٹ بی بی سی اردو ڈاٹ کام، اسلام آباد

	امریکہ اور دیگر یورپی ممالک پاکستان سے مطالبہ کرتے رہے ہیں کہ انہیں ڈاکٹر قدیر تک تفتیش کے لیے رسائی دی جائے

جماعت کی جانب سے جاری کیا گیا یہ بیان ایک ایسے وقت پر سامنے آیا جب اس بارے میں بے نظیر بھٹو کی امریکہ میں ایک تقریر پر حکومت اور دیگر سیاسی جماعتوں کے جانب سے شدید ردعمل سامنے آیا ہے۔

پاکستان میں شائع ہونے والے تقریباً تمام اخبارات میں کہا گیا ہے کہ سابق وزیراعظم بے نظیر بھٹو نے واشنگٹن میں ایک امریکی تھنک ٹینک سے خطاب کے دوران کہا کہ ان کی حکومت قائم ہونے کی صورت میں وہ عالمی ایجنسی برائے جوہری توانائی یعنی آئی اے ای اے کو تفتیش کے لیے ڈاکٹر قدیر خان تک رسائی دے دیں گی۔

دنیا میں جوہری ہتھیاروں کے پھیلاؤ کے الزامات سامنے آنے کے بعد فروری دو ہزار چار سے حکومت پاکستان نے ڈاکٹر قدیر خان کو اسلام آباد میں ان کی رہائش گاہ پر نظر بند کر رکھا ہے۔ امریکہ اور دیگر یورپی ممالک پاکستان سے مطالبہ کرتے رہے ہیں کہ انہیں ڈاکٹر قدیر تک تفتیش کے لیے رسائی دی جائے۔ پاکستان اس درخواست کو مسترد کرتا رہا ہے۔

متنازعہ بیان  اس متنازعہ بیان کا ایسے وقت پر سامنے آنا جب ملک میں انتخابات کی تیاریاں جاری ہیں پیپلز پارٹی کے لیے انتہائی نقصان دہ ثابت ہوسکتا ہے مبصرین

پیپلز پارٹی نے اپنے وضاحتی بیان میں کہا ہے کہ بےنظیر بھٹو نے ایک سوال کے جواب میں صرف اتنا کہا تھا کہ ان کی حکومت عالمی ادارے سے تحقیقات میں مکمل تعاون کرے گی۔ ان کے مطابق یہ موقف موجودہ حکومت کے موقف سے بالکل مختلف نہیں ہے۔

بیان میں اس بات پر افسوس کا اظہار کیا گیا ہے کہ بے نظیر بھٹو کے الفاظ کو غلط رنگ میں پیش کیا جا رہا ہے کہ جیسے انہوں نے کسی کو غیر ملکیوں کے حوالے کرنے کی بات کی ہے۔

مبصرین کے خیال میں اس متنازعہ بیان کا ایسے وقت پر سامنے آنا جب ملک میں انتخابات کی تیاریاں جاری ہیں پیپلز پارٹی کے لیے انتہائی نقصان دہ ثابت ہوسکتا ہے۔