عبدالحئی کاکڑ بی بی سی اردوڈاٹ کام، پشاور

	سرحد میں سی ڈی سینٹروں اور حجام کی دکانوں کا بم کا نشانہ بننا معمول بن چکا ہے

ضلع بونیر کے علاقے پیر بابا کے ایس ایچ او حبیب اللہ نے بی بی سی کو بتایا کہ دھماکہ سنیچر کی صبح پانچ بجے صدر مقام ڈگر سے چودہ کلومیٹر دور پیر بابا بازار میں واقع ادریس مارکیٹ کےایک میوزک سینٹر میں ہوا۔ اس واقعے میں دو افراد معمولی زخمی ہوئے ہیں جبکہ آس پاس کی چودہ دکانوں کو شدید نقصان پہنچا ہے۔

انہوں نے مزید بتایا کہ زخمی ہونے والے افراد حجام کی دکان میں بیھٹے ہوئے تھے جنہیں ابتدائی طبی امداد فراہم کرنے کے بعد ہسپتال سے فارغ کردیا گیا ہے۔ان کے بقول دھماکے میں آتش گیر مادے کا استعمال کیا گیا تھا۔انہوں نے کہا کہ حالیہ بم دھماکے صوبے میں حجاموں اور سی ڈی سینٹروں کے خلاف ہونے والے بم دھماکوں کی کڑی ہے۔

واضح رہے کہ سوات سے ملحقہ ضلع بونیر کے سواڑہ کے علاقے میں تین ہفتے قبل بھی موسیقی کی دکانوں کو تقریباً تین بم دھماکوں کا نشانہ بنایا گیا تھا۔صوبہ سرحد کے زیادہ تر اضلاع میں ’گمنام خطوط ملنے‘ کے بعد سی ڈی سینٹروں اور حجام کی دکانوں کو بم حملوں کا نشانہ بنائے جانا ایک معمول بن چکا ہے اور حکومت اس کی روک تھام میں تاحال ناکام نظر آرہی ہے۔