ہارون رشید بی بی سی اردو ڈاٹ کام، اسلام آباد

	سٹرٹیجک مذاکرات کا پہلا دور اپریل 2006ء میں واشنگٹن میں ہوا تھا

وزارت خارجہ میں ہونے والے ان مذاکرات میں پاکستانی وفد کی قیادت سیکرٹری خارجہ ریاض محمد خان جبکہ امریکی وفد کی رہنمائی نائب وزیر خارجہ جان نیگروپونٹے کر رہے ہیں۔ مذاکرات میں جنوبی ایشیا کے لیئے امریکی نائب وزیر خارجہ رچرڈ باؤچر بھی موجود ہیں۔

مذاکرات کے بعد بدھ کی سہہ پہر صحافیوں کو اس میں ہونے والی پیش رفت سے آگاہ کیا جائے گا۔

امریکی سفارت کاروں کا کہنا ہے کہ نائب وزیرخارجہ رچرڈ باؤچر ان مذاکرات کے لیےگزشتہ جعمہ سے پاکستان میں تھے۔

دفتر خارجہ کی ترجمان تسنیم اسلم نے گزشتہ روز ایک بریفنگ سےخطاب کرتے ہوئے کہا کہ دونوں ممالک کے درمیان بات چیت میں اقتصادی تعاون، تعلیم، سلامتی، انسداد دہشت گردی اور توانائی سمیت مختلف سماجی شعبوں پر توجہ دی جائے گی۔

بات چیت میں قبائلی علاقوں میں امریکی تعاون سے تعمیرنو مواقع زونز کے قیام اور قبائلی علاقوں کی ترقی کے منصوبے پر بھی تبادلہ خیال ہوگا۔

اس سے قبل سٹرٹیجک مذاکرات کا پہلا دور اپریل 2006ءمیں واشنگٹن میں ہوا تھا۔ مارچ 2006ء میں صدر بش کے دورہ پاکستان کے دوران دونوں ممالک کے صدور نے ادارہ جاتی نظام وضع کر کے سٹرٹیجک مذاکرات شروع کرنے کا فیصلہ کیا تھا۔

پاکستان توانائی کے شعبہ میں پاک۔امریکہ مذاکرات میں پیش رفت چاہتا ہے کیونکہ یہ ایک اہم شعبہ ہے اور امریکی ماہرین کو توانائی کے متبادل ذرائع اور ان کے استعمال کے بارے میں تجاویز دی گئی ہیں ترجمان

توقع ہے کہ جان نیگرو پونٹے اپنے قیام کے دوران اعلٰی حکام سے ملاقاتیں کریں گے۔

پاکستان اور امریکہ کے درمیان سٹرٹیجک مذاکرات سے توقعات اور پیش رفت کے سوال پر ترجمان کا کہنا تھا کہ پاکستان امریکہ کے ساتھ تعلیم، سائنس، ٹیکنالوجی اور توانائی کے شعبوں میں تعاون کو فروغ دینا چاہتا ہے۔

پاکستان اپنے طلباءکو امریکہ میں اعلٰی تعلیم اور تربیت کیلئے بھیجنا چاہتا ہے کیونکہ گیارہ ستمبر کے حملوں کے بعد امریکی ویزہ کےحصول کےطریقہ کار میں پیچیدگیوں کے باعث امریکہ جانے والے پاکستانی طلباءکی تعداد میں کمی آئی ہے۔

ترجمان نے کہا کہ پاکستان توانائی کے شعبہ میں پاک۔امریکہ مذاکرات میں پیش رفت چاہتا ہے کیونکہ یہ ایک اہم شعبہ ہے اور امریکی ماہرین کو توانائی کے متبادل ذرائع اور ان کے استعمال کے بارے میں تجاویز دی گئی ہیں۔

ترجمان نے کہا کہ سائنس و ٹیکنالوجی کے حوالے سے پاکستان کی خواہش ہوگی کہ اس کے طلباءاور ماہرین کو امریکی تعلیمی اداروں میں اعلیٰ تعلیم اور تربیت کے مواقع ملیں۔

انہوں نے کہا کہ کئی ممالک پاکستان میں یونیورسٹیوں کے قیام کیلئے معاونت فراہم کر رہے ہیں اور پاکستان کی خواہش ہے کہ امریکہ اس شعبہ میں بھی اپنی معاونت کو توسیع دے۔

ان کا کہنا تھا کہ پاکستان ملک میں امریکی یونیورسٹیوں کے کیمپسز کھولنے کا خیرمقدم کرے گا۔دونوں ممالک کے حکام صحافیوں کو بھی بدھ کو اپنے فیصلوں سے آگاہ کرنے کے لیے بریف کریں گے۔