احمدرضا بی بی سی اردو ڈاٹ کام، کراچی

	پیمرا نے 30 جون 2007ء کو ایف ایم 103 پر بی بی سی کے بلیٹنز کی آزمائشی نشریات بند کرادی تھیں

جسٹس ضیاء پرویز پر مشتمل ہائی کورٹ کی سنگل بنچ نے جمعرات کو اپیلوں کی سماعت شروع کی تو الیکٹرانک میڈیا کے نگراں ادارے پیمرا کے وکلاء ناصر ایاز اور کاشف حنیف نے اپیلوں کے قابل سماعت ہونے کو چیلنج کیا جس پر اپیل کنندگان کے وکیل عدنان چودھری نے اپیلوں کے حق میں دلائل دیئے۔

انہوں نے کہا کہ بی بی سی پاکستان اور مست ایف ایم 103 نے پیمرا کی منظوری سے معاہدہ کیا تھا جس کے تحت یہ بلیٹنز نشر ہونا شروع ہوئے تھے تاہم کچھ ہی دن بعد پیمرا نے ایک دوسرے حکم کے تحت ایف ایم 103 کو بی بی سی کے بلیٹنز نشر کرنے سے روک دیا جو کہ اختیارات سے تجاوز اور صحافت اور قانونی تجارت کی آزادی کے بنیادی حقوق کی خلاف ورزی ہے۔

دونوں فریقین کے وکلاء نے عدالت کو الگ الگ درخواستیں دیکر استدعا کی کہ وہ عدالت کو مست ایف ایم 103 پر نشر ہونے والے بی بی سی کے بلیٹن کی ریکارڈنگ سنوانا چاہتے ہیں۔ جسٹس ضیاء پرویز نے اپنے حکم میں کہا کہ جب عدالت نے ضروری سمجھا تو ریکارڈنگ سنوائی جاسکتی ہے۔

عدالت نے اپیلوں کی سماعت جمعہ تک ملتوی کردی اور پابندی کے خلاف حکم امتناع برقرار رکھنے کا حکم دیا۔

یاد رہے کہ پیمرا نے 30 جون 2007ء کو ایف ایم 103 پر بی بی سی کے بلیٹنز کی آزمائشی نشریات بند کرادی تھیں۔ پانچ منٹ دورانئے کے یہ بلیٹنز 22 جون سے ایف ایم 103 کے ذریعے پاکستان کےچار بڑے شہروں کراچی، لاہور، فیصل آباد اور ملتان میں نشر ہونا شروع ہوئے تھے۔