علی سلمان بی بی سی اردو ڈاٹ کام لاہور

	اختلاف رائے رکھنے والوں کو پارٹی سے نکال نہیں دیا جائے گا: پرویز الہی

ظفر اللہ جمالی نے گزشتہ روز (پیر کو) ہی گوجرانوالہ میں مسلم لیگی رہنماحامد ناصر چٹھہ اور دیگر مسلم لیگی دھڑوں سے ملاقات کی تھی اور کہا تھا کہ وہ متحدہ مسلم لیگ بنانے کے لیے کوشش کر رہے ہیں لیکن اس مسلم لیگ میں چودھری صاحبان یعنی چودھری شجاعت حسین اور چودھری پرویز الہی شامل نہیں ہونگے۔

وزیر اعلیٰ پنجاب نے منگل کی دوپہر لاہور میں اپنے دفتر آٹھ کلب روڈ پر ایک پریس کانفرنس سے خـطاب کرتے ہوئے کہا کہ ظفراللہ جمالی نے جب وزیراعظم بننا تھا تب مسلم لیگ ان کی نظر میں اچھی تھی اب جب وہ مسلم لیگ چھوڑ چکے ہیں تو وہ کوئی فتنہ لیگ بنا رہے ہیں۔انہوں نے کہا کہ ظفر اللہ جمالی کو چاہیے کہ وہ اس مسلم لیگ کا نام متحدہ کی بجائے ’فتنہ لیگ‘ ہی رکھیں۔

وزیر اعلیٰ پنجاب نے کہا کہ مسلم لیگ نواز سے کسی بھی قسم کا اتحاد یا مفاہمت نہیں ہوسکتی۔انہوں نے کہا کہ وہ مسلم لیگ نون سے کوئی بات کر رہے ہیں نہ کرنا چاہتے ہیں۔

بے نظیر بھٹو سے مذاکرات ہو رہے ہیں لیکن ان مذاکرات کا جوبھی نتیجہ نکلے ان کی مسلم لیگ پیپلز پارٹی سے کوئی انتخابی اتحاد بنائے گی نہ سیٹ ایڈجسٹمنٹ ہوگی پرویز الٰہی

مسلم لیگ کے صوبائی صدر نے کہا کہ بے نظیر بھٹو سے مذاکرات ہو رہے ہیں لیکن ان مذاکرات کا جوبھی نتیجہ نکلے ان کی مسلم لیگ پیپلز پارٹی سے کوئی انتخابی اتحاد بنائے گی نہ سیٹ ایڈجسٹمنٹ ہوگی۔

انہوں نے اپنے اس مؤقف کو دھرایا کہ انتخابات کے بعد حکومت سازی کے لیے پیپلز پارٹی سے بات ہوسکتی ہے۔ وزیر اعلی نے اس بات کی تصدیق کی کہ ان کی مجلس عمل کے سیکرٹری جنرل اور قومی اسمبلی میں قائد حزب اختلاف مولانا فضل الرحمان سے مذاکرات ہوئے ہیں۔

چودھری پرویز الٰہی نے کہا کہ ان سے کچھ امور پر بات ہوئی ہے اور اب فضل الرحمان اپنے ساتھیوں سے صلاح ومشورہ کریں گے جس کے بعد کوئی نتیجہ سامنے آسکتا ہے۔

انہوں نے اس تاثر کی تردید کی کہ مسلم لیگ میں کوئی بغاوت ہورہی ہے۔انہوں نے کہا کہ اختلاف رائے رکھنے والوں کو پارٹی سے نکالا نہیں جائےگا اور انتخابات کے نزدیک اس بات کا فیصلہ ہوگا کہ انہیں پارٹی ٹکٹ دیا جائے یا نہیں۔