رفعت اللہ اورکزئی بی بی سی اردو ڈاٹ کام پشاور

	خار کے گرینڈ جرگہ میں تقریباً پانچ سو قبائلی مشران، اراکین پارلمینٹ اور ایجنسی کونسلرز نے شرکت کی

باجوڑ کے ایک اعلی سرکاری اہلکار نے بی بی سی کو بتایا کہ جمعرات کے روز صدر مقام خار میں باجوڑ کے تمام اقوام کا گرینڈ جرگہ منعقد ہوا جس میں تقریباً پانچ سو قبائلی مشران، اراکین پارلمینٹ اور ایجنسی کونسلرز نے شرکت کی۔

جرگہ میں فیصلہ ہوا کہ ایک ہفتے کے اندر اندر قبائلی مشران مقامی طالبان کے نمائندوں سے علاقے میں امن کے قیام اور امن معاہدے پر عمل درآمد نہ ہونے کے حوالے سے بات چیت کرینگے۔

سرکاری ذرائع کا کہنا ہے کہ جرگہ سے خطاب میں پولیٹکل ایجنٹ شفیر اللہ خان نے خبردار کیا کہ اگر جرگہ ناکام ہوا تو علاقے میں امن کے قیام کےلئے سخت اقدامات اٹھائے جاسکتے ہیں۔

ان کا کہنا تھا کہ امن معاہدے کے باوجود باجوڑ میں سرکاری اہلکاروں کونشانہ بنایا جارہا ہے جبکہ حکومتی چیک پوسٹوں پر بھی حملے کئے جارہے ہیں۔

جرگہ میں شامل رکن قومی اسمبلی مولوی محمد صادق نے بی بی سی کو بتایا کہ جرگہ میں اس بات پر تفصیل سے بات ہوئی کے باجوڑ ایجنسی میں سرکاری اہلکاروں اور پوسٹوں پرجاری حملوں میں کون لوگ ملوث ہیں۔ ان کے بقول طالبان ان حملوں سے لاتعلقی کا اظہار کررہے ہیں۔

انہوں نے کہا کہ جرگہ ایک ہفتے کے اندر طالبان کے نمائندوں سے بات چیت مکمل کرکے حکومت کو رپورٹ پیش کریگا۔

واضح رہے کہ تقریباً چار ماہ قبل باجوڑ میں حکومت اور مقامی قبائل کے مابین ایک امن معاہدہ طے پایا تھا جس میں قبائل نے غیر ملکیوں کو پناہ نہ دینے اور علاقے میں امن وامان برقرار رکھنے میں حکومت کو تعاون کی یقین دہانی کرائی تھی۔

باجوڑ ایجنسی میں گزشتہ برس القاعدہ اور طالبان کے شبہہ میں امریکی اور پاکستانی فوج نے دو بڑی کارروائیاں کی تھیں۔ جنوری میں تین مکانات پر امریکی حملے میں تیرہ جبکہ اکتوبر میں ایک مدرسے پر پاکستانی حملے میں اسی سے زائد افراد ہلاک ہوئے تھے۔ ان حملوں کے بعد سے علاقے میں امن وامان کی صورتحال خراب رہی ہے۔

چند روز قبل بھی باجوڑ میں ایف سی کے دو اہلکاروں کی لاشیں ملی تھیں جبکہ رات کے وقت سرکاری چیک پوسٹوں پر حملے معمول بن چکا ہے۔