ہارون رشید بی بی سی اردو ڈاٹ کام ،اسلام آباد

	مسجد کے قریب رہنے والے خاندانوں کو کرفیو پاس جاری کئے جا رہے ہیں

اسلام آباد میں پریس کانفرنس سے خطاب کرتے ہوئےوفاقی وزیر داخلہ نے لال مسجد میں موجود مسلح افراد سے کہا کہ وہ یرغمال بنائے جانے والے افراد بالخصوص خواتین کو فوری رہا کر کے خود کو قانون کے حوالے کر دیں۔

پریس کانفرنس میں وزیر داخلہ نے مسجد اور مدرسے کی تصاویر بھی ذرائع ابلاغ کے نمائندوں میں تقسیم کیں جو فضا سے لی گئی تھیں ان کا کہنا تھا کہ کسی چھت کو کوئی نقصان نہیں پہنچا ہے۔

وزیر داخلہ آفتاب شیرپاؤ کے مطابق آج پانچ مزید افراد مسجد سے نکلنے میں کامیاب رہے۔اس کوشش میں تین طالبات کے زخمی ہونے کی بھی تصدیق کی گئی ہے۔

انہوں نے کہا کہ لال مسجد کے قریب رہنے والے خاندانوں کو کرفیو پاس جاری کیے جا رہے ہیں۔ کرفیو سے متاثرہ علاقوں میں پیر سے بنک، ادویات اور دیگر ضروریات زندگی کی دوکانیں کھول دی جائیں گی تاکہ کرفیو کے وقفے میں ان سے فائدہ اٹھایا جا سکے۔ انہوں نے کہا کہ ابھی تک ہونے والے آپریشن کا مقصد محصورین کی رہائی ہے۔

وزیر داخلہ نے کہا کہ حکومت لال مسجد میں ایمبولینس بھیجنے کے لیے تیار ہے، مسلح افراد زخمیوں اور لاشوں کو بھجوا سکتے ہیں۔ انہوں نے عبدالرشید غازی کے اس دعوے کی تردید کی کہ گزشتہ روز سیکیورٹی ایجنسیوں کی فائرنگ سے مدرسے کی چھت گر گئی ہے جس سے تین سو سے زائد طالبات ہلاک ہو گئےہیں۔

وزیر داخلہ نے بتایا کہ اتوار کو کرفیو میں دو مرتبہ نرمی کی گئی اور غریب طبقے والےعلاقے میں مفت راشن بھی تقسیم کیا گیا ہے۔ یوٹیلٹی موبائل وینز کی تعداد چوبیس سے بڑھا کر اڑتالیس کر دی گئی ہے جبکہ سوئی گیس حکام کا کہنا ہے کہ نوئے فیصد علاقے کو گیس کی ترسیل بحال کر دی گئی ہے۔