عبدالحئی کاکڑ بی بی سی اردوڈاٹ کام، پشاور

	پشاور پولیس کا اہلکار جائے جادثہ کا جائزہ لے رہا ہے

پشاور کے ڈی آئی جی عبدالمجید مروت نے بی بی سی کو بتایا کہ یہ واقعہ اتوار کی رات نو بجکر پینتالیس منٹ پر چارسدہ روڈ پر پیش آیا۔

ان کا کہنا تھا کہ تین گاڑیوں میں سوار مسلح افراد نے چار چینی باشندوں کو چارسدہ روڈ پر گولیوں کا نشانہ بنایا جس میں تین موقع پر ہلاک جبکہ چوتھا زخمی ہوگیا تاہم حملہ آور فرار ہونے میں کامیاب ہوگئے۔

ان کے بقول زخمی ہونے والے چینی باشندے کو لیڈی ریڈنگ ہسپتال منتقل کردیا گیا ہے جہاں اس کی حالت خطرے سے باہر ہے۔

ڈی آئی جی کا کہنا تھا کہ بظاہر ایسا معلوم ہورہا ہے کہ یہ دہشتگردی کی ورادات ہے تاہم پولیس مزید تفتیش کے بعد ہی کسی حتمی نتیجے پر پہنچ سکے گی۔ان کے مطابق ابھی تک اس سلسلے میں کسی قسم کی کوئی گرفتاری عمل میں نہیں لائی جا سکی ہے۔

عبدالمجید مروت کا کہنا تھا کہ چاروں چینی باشندے پشاور میں دو سال سے رہائش پذیر تھے اور وہ یہاں پر رکشوں کو سی این جی ِکٹس لگانے کا کاروبار کرتے تھے۔ان کا یہ بھی کہنا تھا کہ ان چینی باشندوں کو بیس جولائی کو چین واپس جانا تھا۔

واضح رہے کہ گزشتہ مہینے لال مسجد کے طلباء کی جانب سے اسلام آباد میں چینی خواتین کو بھی اغواء کیا گیا تھا۔ ماضی میں بھی بلوچستان اور جنوبی وزیرستان میں چینی باشندوں کو اغواء اور قتل کرنے کے واقعات پیش آئے ہیں۔