علی سلمان بی بی سی اردو ڈاٹ کام، لاہور

	پیپلز پارٹی کی سربراہ بے نظیر بھٹو کی اس اے پی سی میں شرکت یقینی نہیں ہے

مسلم لیگ نواز کی جانب سے برطانوی ہائی کمشن کوویزوں کے لیےجو ابتدائی فہرست بھجوائی گئی ہے اس میں جماعت اسلامی کے امیر قاضی حسین احمد اور نواب اکبر بگٹی کے صاحبزادوں کے نام بھی شامل ہیں۔

کانفرنس سات اور آٹھ جولائی کو لندن میں ہوگی۔ فہرست کے پہلے چھ نام عدلیہ سے متعلق ہیں جن میں سرفہرست ریٹائرڈ جج ناصر اسلم زاہد، دوسرے نمبر جسٹس ریٹائرڈ فخر الدین جی ابراہیم اور تیسرا نام جسٹس ریٹائرڈ طارق محمود کا ہے۔ فہرست میں اعتزاز احسن جو چیف جسٹس کے وکیل ہونے کے ساتھ ساتھ پیپلز پارٹی کے رہنما بھی ہیں، چیف جسٹس کے ساتھ ہونے والے حکومتی رویے کے خلاف مستعفی ہونے والے جج جواد ایس خواجہ کے نام بھی شامل ہیں۔ ہے۔

حناجیلانی،عابد حسن منٹو اورسپریم کورٹ بار ایسوسی ایشن کے مرزا عزیز اکبر بیگ کا نام بھی برطانیہ کے ویزے کے لیے بھجوایا گیا ہے۔

جس سے بظاہر یوں معلوم ہوتا ہے کہ عدلیہ سے متعلق وہ افراد جو موجودہ عدالتی بحران میں اہم حکومت مخالف کردار ادا کررہے ہیں انہیں بھی اے پی سی میں شمولیت کی خصوصی دعوت دی گئی ہے۔

پیپلز پارٹی کی سربراہ بے نظیر بھٹو کی اس اے پی سی میں شرکت یقینی نہیں ہے البتہ ان کی طرف سے پیپلز پارٹی پارلیمنٹرین کے سربراہ مخدوم امین فہیم کی سربراہی میں ایک وفد اس میں شریک ہوگا۔

مجلس عمل کے سیکرٹری جنرل اور قائد حزب اختلاف مولانا فضل الرحمان اور تحریک انصاف کے سربراہ عمران خان اس اے پی سی میں شامل ہونے کا عندیہ دے چکے ہیں۔

مسلم لیگ کے اقبال ظفر جھگڑ ا کا کہناہے کہ اکہتر لوگوں کے ویزے کے لیے بھجوائی گئی فہرست ابھی ادھوری ہے اور جلد مزید نام بھجوائے جائیں گے۔